Сумар дня на 16. марця 2021 р.

Приносиме вам сумар медияльной ґрупы ЛЕМ.фм+ на ден 16. марця 2021 р.

Новый розклад ізды потягів до Крениці

Од неділі, 14. марця, змінил ся розклад ізды потягів на трасі з Кракова і Тарнова до Нового Санча, Мушыны і Крениці. Новый розклад обовязувал буде аж до 12. червця/юнія тр. Вшытко з причыны модернізацийных робіт на ріжных одтинках желізницьовой леніі но 96. В тым часі подорожны будут мочы хоснувати заступчу автобусову комунікацию. Як подала Малопольска Желізниця, за каждый стриманый потяг введены будут што найменше два заступчы автобусы. Єден, котрый буде обслугувал вшыткы пристанкы ци стациі, і другій приспішеный, котрый буде мал на своій трасі менше чысло пристанків. Додатково на выбраных курсах до і з Крениці буде можливіст везти роверы. Першый етап модернізациі пройде на трасі Тарнів-Новый Санч-Крениця та Тарнів-Ясло і тырвал буде од 6. квітня/апріля до 17. мая. Пак, безпосередньо по закінчыню, бо уж од 18. мая, ремонтовы роботы перенесены будут на трасу Біч-Ясло, де винны ся закінчыти 12. червця/юнія.

Наступне досліджыня стану повітря в ґміні Мушына

Під конец січня/януара інформували сме о веденых в курортній ґміні Мушына досліджынях стану повітря. Товды бургомайстер ґміны Мушына, Ян Ґольба, заповіл, же неодолга акция буде повторена, і так ся тіж стало. Дальшы досліджыня ведены были в місті Мушына і околичных селах. До акциі схоснуваный был дрон выпосаженый в модерну технолоґію анализуваня складу повітря. Результаты сут дале оптимістичны, перекрочыня дозволеных норм обсервувано лем в трьох місцях. Цілю акциі єст не лем провірити, чым жытелі ґміны палят в своіх пецах, але головні задбати о іх здоровля. Досліджыня будут повторюваны до кінця зимы.

Поліциянты з Устя Руского перенесли ся до Ґорлиц

Поліциянты з постерунку в Устю Рускым перенесли ся до ґорлицкой коменды. Од понеділька, 15. марця, зо взгляду на початок наступного етапу будовляных прац постерунок поліциі был тымчасово закрытый. На час тырваня будовы, функцийонеры принимати будут жытелів ґміны в Повітовій Коменді Поліциі в Ґорлицях при ул. 11 Листопада при захованю тых самых контактовых телефонів. Додатково, в уряді ґміны одкрыто тымчасовый пункт приниманя інтересантів. Пункт буде функцийонувал в понедільок, середу і пятницю в годинах од 10.00 до 12.00. Введены зміны будут обовязувати аж до часу одданя до хоснуваня нового будинку постерунку поліциі. Закінчыня будовляных прац заплянувано на 30. червця/юнія тр., а кошт цілой інвестициі вынесе близко 5 млн зл.

Фотоґрафічно-краєзнавчый конкурс «4 поры рока» 

Етноцентр Коросняньской Землі просит до участи в фотоґрафічно-краєзнавчым конкурсі «4 поры рока». Єст то перша едиция конкурсу, а тогорічном головном темом сут «Капличкы коросняньской землі». Змаганя пройдут в двох віковых катеґориях, особы вроджены медже 2002 а 2007 роком і тоты вроджены перед 2002. Роботы мож слати до 31. жолтня/октобра тр. на адрес ЕКЗ. Зголосити мож лем єдну знимку капличкы з коросняньской землі, обовязково з описом єй локализациі, істориі ци додатковыма інтересуючыма інформациями. Конкурсова капітула в каждій катеґориі оголосит три найліпшы працы, котры будут фінансово нагороджены, і три выріжніня. Окремо каждый участник отримат нагороду за саму участ в конкурсі. Більше деталів находит ся на офіцийным сайті Етноцентру Коросняньской Землі.

Постойовы колибы на біциґльовых трасах в ґміні Крампна

На конец добра інформация для любителів роверовой ізды по Низкым Бескіді. В ґміні Крампна на біциґльовых трасах возникнут постойовы колибы. На тоту ціль самоуряд ґміны отримал з Урядового Фонду Локальных Інвестиций аж 500 тис. зл, што близко в цілости покрыє кошты інвестициі. При роверовых стежках выбудуваных буде сім колиб з місцьом на ватру і 11 малых альтанок. Війт ґміны Крампна, Казімєж Міськович підписал уж догваріня з выконавцьом фірмом EPX.