Сумар дня на 16. січня/януара 2025 р.

Приносиме вам сумар медияльной ґрупы ЛЕМ.фм+ на ден 16. січня/януара 2025 р.

Президент Дуда принял представників реліґій і нацийональных меншын

14. січня/януара Президент Анджей Дуда і Перша Дама Аґата Корнгаусер-Дуда приняли в Президентскым Палаци в Варшаві представників ріжных церкви і вызнаньовых звязкых та нацийональных і етнічных меншын. Президент оцінил, што то барз символична стріча, і зазначыл, што участ в ній взяли представникы вшыткых найважнійшых реліґій і конфесий в Польщы. Анджей Дуда припомнул, што два рокы тому Польща припоминала 450 років варшавской конфедерациі – закону, якій вводил загальну реліґійну свободу. Присутны на стрічы были м.ін. представникы римокатолицкого Костела, православной і грекокатолицкой Церкви ци репрезентанты Спільной Комісиі Нацийональных і Етнічных Меншын. Того рода новорічна стріча президента є уж традицийом, но остатній раз орґанізувал єй Анджей Дуда на тій посаді.

Вмер владыка Ладислав Гучко

Як інформувал на офіцияльным сайті Апостольского Еґзархату Грекокатолицкой Церкви в Чешскій Республиці протосинкель Василь Сливоцкій, 14. січня/януара 2025 р. вмер в шпытали в Празі по короткій хвороті владыка Ладислав Гучко, пражскій апостольскій еґзарха, титулярный єпископ орейскій. Владыка Ладислав Гучко народил ся 16. лютого/фебруара 1948 р. в Пряшові, в родині русиньского грекокатолицкого священника. Папа Йоан Павел ІІ 24. квітня/апріля 2003 р. призначыл го Апостольскым Еґзархом для католиків візантийского обряду в Чехах. На посаді вычерял першого пражского еґзарху, владыку Івана Лявинця. Єпископску хіротонію принял 31. мая 2003 р. в Празі з рук тепершінього рускокерестурского єпископа – кыр Георгія Джуджара. За інформациями од родины владыкы Ладислава, похоронны обряды одбудут ся в Празі, де собі желал быти похованый.

Публикациі о Новосільскым

Пару дни тому в Ягайлоньскій Бібліотеці одбыла ся стріча творців выдавничой сериі др Кристины Черні посвяченой сакральній творчости проф. Юрия Новосільского. Публикация сериі была выріжнена Нагодором Стоваришыня Істориків Штукы ім. проф. Лозіньского за 2024 р. Выданый был 6 том циклю пн. «Новосільскій. Іконы церкви і архітектонічны ескізы». В часі стрічы выступил мужскій хор церковной музикы Карапетасма. Новый, 6 том буде неодолга доступный в бібліотеці Руской Бурсы. Вшыткы інчы книжы з сериі уж сут в нашій бібліотеці, доступны для Вас.

Ден Русинів Сербіі

В найблизшу суботу одбуде ся святкуваня нацийонального свята Русинів Сербіі. Ден Русинів Сербіі припадат каждого рока на 17. січня/януара, но того рока центральны празднуваня одбудут ся в Сримскій Митровици в суботу. Святкуваня зачнут ся од архієрейской Божеской Літургіі в церкви Вознесіня Господнього, котру одслужыт владыка Георгій Джуджар. Буде і припомненена 100. річниця першого выданя «Руских новинох» і 80 років Новинарско-Выдававничой Установы «Руске слово». О 20.00 год. зачне ся святочна академія в Великій Сали Театру «Добрица Милутинович», в котрій запрезентуют ся русиньскы колективы і солисты.