Сумар дня на 16. січня/януара 2026 р.

Приносиме вам сумар медияльной ґрупы ЛЕМ.фм+ на ден 16. січня/януара 2026 р.

”Руска Бурса” здобыла ґрант Фундациі PKO BP на інституцийональный розвиток

Радо інформуєме што Стоваришыня ”Руска Бурса” в Ґорлицях нашло ся в шорі позаурядовых орґанізаций, што здобыли довіря Фундациі PKO Польского Банку і отримали ґрант на інституцийональный розвиток. Як подала Фундация PKO BP, до конкурсу ”Корені будучности (Korzenie jutra)» вплынуло аж 460 внесків на барз высокым мериторичным рівни. В одповіди на скалю потреб пуля середків была звекшена з 15 до 20 млн злотых. Ґранты были признаны 43 орґанізациям. Іх полный спис находит ся на сайті Фундациі PKO BP. О дрібницях будеме онедолга інформувати.

Выстартувала реализация обводниці Ясла вздолж DK73

Як інформувала Ґенеральна Дирекция Доріг і Автострад, підписали догваріня на реализацию обводниці Ясла вздолж Державной Дорогы нр 73. Выконавцьом єст фірма Інтеркор, яка за квоту 324 млн злотых запроєктує і выбудує близко 10-кілометрову трасу. Нова дорога буде ішла ясельскым повітом через ґміны Колачыці і Ясло та місто Ясло. Обводниця Ясла то єдна з задач, што змінит трасу і выгляд DK73 аж по Пільзно. Дорога належыт до основного комунікацийного укладу державы, што веде рух в напрямі пілніч-полудне. На обшыри підкарпатского воєвідства являт ся важным комунікацийным путьом од автострады А4 через Пільзно, Бжостек і Ясло. Позвялят тіж на доізд до граничных переходів: з Украіном в Коростенку та зо Словацийом в Барвінку.

Одкрытя выставы «Формы присутности. Штука Лемків / Карпатскых Русинів»

Уж од заране в польскій столици одкрыта для одвиджаючых буде часова выстава пн. «Формы присутности. Штука Лемків / Карпатскых Русинів». Презентувана буде до 30. червця/юнія тр. в Державным Етноґрафічным Музею в Варшаві. Єст то перша так шырока презентация артистичного доробку Лемків / Русинів, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША.

Подіі товаришучы выставі «Формы присутности. Штука Лемків / Карпатскых Русинів»

Выставі «Формы присутности. Штука Лемків / Карпатскых Русинів» товаришыти будут тематичны подіі. Припомнийме о тых, што одбудут ся уж в найблизшый вікенд. Заран одбуде ся перша стріча з циклю подій, в часі котрых артисты презентуючы своі працы на выставі стрітят ся з публиком, a пак поведут творчы варштаты. Вюл єй буде Давид Здобыляк. На тоту подію чысло місц єст ограничене і білетуване. А о ден, в неділю 18. січня/януара буде мож взяти участ в двох тематичных опроваджанях по выставі, якы вюл буде куратор выставы др Михал Шымко. Перше буде посвячене памяти і зачне ся о 11:00 год, другє – культурній достоменности лемківской/русиньской соспільности. Зачне ся оно о 16:00 год. Подіі будут тлумачены на Польскій Жестовый Язык. Того дня одбудут ся іщы фамелийны плястичны варштаты. Каждый участник створит власный фраґмент краєвиду, а пак доданы будут до него дальшы елементы, што створят єдну спільну композицию. До варштатів мож долучыти в свобідным моменті од 12.00 до 16.00 год. Вхід на недільны подіі в рамаках білету вступу на выставу.