Сумар дня на 16. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 16. жолтня/октобра 2025 р.

Стоваришыня Лемків переказало Нагороду ім. Никыфора дла Грабана, Басалыґы. Делеґация зашла на гріб бл. п. Михала Сандовича

Коли в минулым тыжни на Лемковині проходила 33. Лемківска Тровча Осін, Капітула Стоваришыня Лемків переказала двом лавреатам статуі Нагороды ім. Никыфора – Епіфана Дровняка – за труд жытя одданый для лемківской культуры. Лавреаты преміі были оголошены вчас тогорічной Лемківской Ватры на Чужыні в Михалові. Окрем Федора Лабика, якій особисто был присутный на серпньовій Ватрі, нагороду отримали Петро Басалыґа, котрый одобрал нагороду в першый ден Лемківской Творчой Осени, яка проходила в Вапенным, і Володислав Грабан, котрому передано нагороду наступого дня. Лавреата одвиділа делеґация Стоваришыня Лемків, на челі з ведучым ГЗ СЛ Андрийом Копчом. В неділю, 12. жолтня/октобра делеґация Стоваришыня Лемків зашла іщы на цмонтрів в Ждыни, де положыла квітя і запалила світило на гробі бл. п. Михала Сандовича, лемківского активісты і давного заступці Ведучого ГЗ СЛ.

Церков в Квятони зо званьом «Чуда Польщы 2025»

Перед даякым часом інформували сме, што памяткова грекокатолицка церков св. Параскєвы в Квятони была номінувана в плебісциті National Geographic «Чуда Польщы 2025». Як раз тепер оголошено, што храм отримал званя «Чуда Польщы 2025». То выняткове місце – памятка архітектуры UNESCO, вписана до списку в 2013 р. Церков выграла м.ін. з інчыма номінуваныма з обшыри воєвідства – Сплывом Дунайцьом і Торфовиском Баліґувка. Храм св. Параскєвы презетнує типовый лемківскій стиль сакрального будівництва. Причысляна єст серед найціннійшы лемківскы церкви.

В парохіі Шамброн святочно

В грекокатолицкій парохіі Шамброн на Пряшівщыні, в неділю 12. жолтня/октобра одбыл ся одпуст з нагоды праздника Покровы Пресвятой Богородиці. Головным служытельом был отец архімандрита Марко Дурляк, протосинкєль Пряшівской Архієпархіі, котрый мал і проповід. Перед торжественном літургійом одбыло ся посвячыня одновленого екстерєру храму і капличкы (гробу) отця Антона Манковича, вчас котрого діяня на парохіі был побудуваный храм в 1872 р. Торжество было збогачене і співом Мужской співочой ґрупы Шанбрінці і місцевых діти. В імени Пряшівской Архієпархіі были на кінци переданы дяковны грамоты Петрови Соколови, Яні Жембовій і Іванови Рожекови за іх жертвенну службу і підпору парохіі.

Выстава о свв. Кірилі і Методию в Пряшові

Выставу ілюстраций, ікон і почтовых значків одкрыли в просторах Православного Богословского Факультету Пряшівского Університету. Выстава приближат образы свв. Кірила і Методия на ілюстрациях, іконах і почтовых значках Штатного Музею Істориі Реліґіі в Петерсбурґу. Подію приготовили ПБФ ПУ, обчаньскє здружыня Кірилометодіада і Фонд Про Патрія. Выстава є достпуна до 20. жолтня/октобра в робочых днях в часі од 13.00 до 17.00 год.