Сумар дня на 17. липця/юлия 2025 р.

Приносиме вам сумар медияльной ґрупы ЛЕМ.фм+ на ден 17. липця/юлия 2025 р.

Вмер Володимир Микыта

В віторок 15. липця/юлия вмер в Ужгороді русиньскій маляр Володимир Микыта. Покійный належал медже клясиків, продолжывателів Підкарпатской Малярской Школы. Все стоял на русиньскыx позициях, голосил ся ґу свому народови. Народил ся 1. лютого/фебруара 1931 р. в селі Ракошыно на Підкарпатскій Руси. По закінчыню Руской Ґімназиі в Мукачеві зачал вчыти ся на Ужгородскым Умелецкым Учылищы під ведіньом прославленых представників русиньской Підкарпатской Малярской Школы – Йосифа Бокшая і Адальберта Ерделі. Не лем познал технічны таємниці своіх учытелів, але і принял іх філософію служыня народови. Мал успіх як портретиста, автор жанровых сценерий, пейзажів і закутин. За його ініциятивом в роках 1989-1990 в Ужгороді было сноване Общество Русинів. Окрем того был участником парох Світовых Конґресів Русинів. За своі осягніня был удостоєный м.ін. званями Заслуженого Артисты Украіны. В 2001 р. стал лавреатом Преміі ім. Штефана Чепы за вызначный вклад до русиньской культуры, в 2005 р. Нацийональной Преміі Украіны ім. Шевченка, а в 2021 першым лавреатом Нацийональной Преміі за русиньскє уменя ім. Івана Манайла Pro Arte Ruthenorum. В Ужгороді находил ся його приватный музей. Вічна Йому Памят!

Неодолга 45. Лемківска Ватра на Чужыні

Ближыт ся 45. Лемківска Ватры на Чужыні в Михалові. В проґрамі, якій зачне ся в пятницю, 8. серпня/авґуста выступлят м.ін. Студенка з Калуша з Украіны, Дуляровы Братя, Зоря, Серенча і Інтраде. Суботній проґрам збогатят такы колективы як: Тераборсук зо Словациі, Малы Ґожовякы, Кычера, Ластівочка, Троянда і Демкай. [jingle – zajavka]

Нове цедечко «Od мати do taty»

Проєкт LEM JAZZ тепер принял назву HORYANA. Як раз тота ґрупа в послідніх днях выпустила свій кружок під наголовком «Od мати do taty». Ведучым колективу є Мирослав Боґонь. «То проєкт, якій барз долго дозрівал в моій голові, але рівно долго не міг взріти денного світла. Чом? Не знам – може зато, што то барз одважна проба получыня народной мелодикы з вышуканом гармонійом і ритміком шыроко понятой розрывковой музикы, часто трудной і незрозумілой для вшыткого, што звычне» – пише ся в описі платні. Нашло ся на ній 11 творів, а серед них більшіст лемківскых. Колектив творят: Мирослав Боґонь, Наталия Ґурка, Пьотр Пжыровскій, Томаш Кубаля і Рафал Бельчык. Платню мож придбати м.ін. контактуючы ся майльово з ансамбльом: mirobog@op.pl.

Грекокатоликы путуют на Святу Гору Явір

Тырват грекокатолицкє поломництво на Святу Гору Явір. Уж заран буде в місцевій каплици служена архієрейска Божеска Літургія. Тогорічны святкуваня для Русинів на Лемковині будут о тілько вынятковы, што богослужыня очелит Высокопреосвященный Йона Максим, пряшівскій грекокатолицкій архієпископ і митрополита при сослужыню другых єпископів та священників з Польщы. Про Русинів (Лемків) в тых днях пришла як раз добра віст зо Словациі – Рада єрархів тамтышньой Церкви схвалила русиньскый Літургікон, што значыт, же русиньскій язык стал офіцияльным літургічным языком грекокатолицкой Церкви на Словациі. По служыню на Яворі, о год. 12.00 на цмонтери в Высовій буде одслужена панахіда при гробі Фіриі Демянчык, якій перед 100 роками обявила ся Пресвята Богородиця.