Сумар дня на 17. марця 2026 р.

Приносиме вам сумар медияльной ґрупы ЛЕМ.фм+ на ден 17. марця 2026 р.

Ден Єдности Кашебiв в Соймi

Од 2004 р. 19. марця є святкуваный як Ден Єдности Кашебiв i є то єдна з найважнiйшых подiй iнтеґруючых кашебску спiльноту. З той нагоды перед парома днями 13. марця ок. 250 представників той меншыны з териториi цiлых Кашеб рiшыло манiфестувати свою культуру i вынятковіст в парляментi. Очывидно не ішо лем о тото, жебы вказати красу танцiв ци народного облечыня, але сильну репрезентацию ґрупы, котра приiхала голосно повісти, што є для Кашебiв як меншыны найважнiйше. Бесiда была о потребi хоронити культуру i язык, о тым, як велика є потреба розвивати iнфраструктуру на пiлночы Польщы, i о iнчых справах звязаных з економiйом в реґiонi, де мешкают Кашебы. Пак был выклад проф. Обрахт-Прондзиньского на тему культуры сучасных Кашеб, а тiж дискусия на тему кашебской достоменности, в котрiй участ брали дiячы i артисты кашебского походжыня. Патронат над подійом тримал маршалок Сойму – Влодзімєж Чажастый i маршалок Сенату – Малґожата Кiдава Блоньска, котры підтримуют меншынову полiтику i того типу iнiциятивы.

Конкурс Сучасной Карпатской Народной Рiзбы в Камени

Музей Санденцкой Землi оголосил V едицию Конкурсу Сучасной Карпатской Народной Рiзбы в Камени. Проходит він што шiст рокiв i є пробом пiдтримати тоту тяжку i уж барз рiдко выконувану штуку, яка в Карпатах мат долгу i богату традицию. Прото орґанiзаторы сердечнi просят брати участ в тiй подii, так професийных творцiв, як i любителів того ремесла, котры жыют на териториi Карпат, Пiдкарпатя, а тiж сусiднiх карпатскых держав. Свою участ треба зголосити до 1. червця/юнія того рока. Найлiпшы рiзбы будут презентуваны на поконкурсовых выставах в Санчы, в Бєльско-Бялiй i Жывци. Вшыткы потрiбны iнформациi заiнтересуваны можут найти на сайтi Мезею Cандецкой Землi.

Перебудова передшколя в Санковiй

Ґмiна Санкова пiдписала умову о дофiнансуваня розбудовы i перебудовы самоурядного передшколя о новый оддiл з яслами. Тоты дiяня будут реализуваны в рамках проєкту «Проґрам розвитку iнституций опiкы над дiтми до 3 рокiв Активна Дiтина 2022-2029». Полна сума умовы то близко 1 800 000 зл, з чого понад 1 400 000 зл то середкы з КПО, а більше як 300 000 походит з буджету державы. Подля плянiв iнвестиция мат быти закiнчена до кiнця серпня/авґуста того рока. Завдякы тому проєктови Санкова буде мала новы, вполни выпосажены мicця для наймолодшых, што буде великом помочом для вельох родин з ґмiны.

Фотоґрафiчный Конкурс «Особливости Ґорлицкой Землі»

Молодiжный Культурный Дiм в Ґорлицях просит ученикiв шкiл з обшыри ґорлицкого повiту взяти участ в XVI Повiтовым Фотоґрафiчным Конкурсi пн. «Особливости Ґорлицкой Землі», котрого гоноровым патроном є Ґорлицкій Староста. Цiлю конкурсу є розвивати заiнтересуваня молодых фотоґрафiйом i шыроко пониманом вiзуальном штуком. Орґанiзаторы хотят, жебы участникы вказали красу свойой «малой вiтчызны», передаючы на знимках єй найбарже характеристичны i неповторны елементы. Конкурс мат двi темовы формулы i три вiковы катеґориi. Найлiпшы фотоґрафii будут презентуваны на поконкурсовiй выставi. Зголошыня мож пересылати до 24. квiтня/апрiля. Вшыткы потрiбны iнформациi заiнтересуваны можут найти на сайтi повiту або Молодiжного Культурного Дому в Ґорлицях.