Сумар дня на 17. мая 2022 р.

Приносиме вам сумар медияльной ґрупы ЛЕМ.фм+ на ден 17. мая 2022 р.

В бібліотеці в Будапешті мож было послухати о русиньскых памятных місцях

В минулым тыжни в просторах Вседержавной Бібліотекы Чужых Языків прошла подія пн. «По слідах Русинів во світі – Русиньскы памятны місця на Підкарпатю, Словациі, в Польщы, Войводині і на Мадярах». Орґанізатором стрічы была Бібліотека Русинів Мадяр ім. проф. Іштвана Удварі. В проґрамі подіі нашли ся штырі рефераты. Презентацию книжок, што находят ся в фонді русиньской бібліотекы, о русиньскых памятных місцях мала єй директорка Ілдіка Поланскіна Надош. О вызначных русиньскых місцях на Підкарпатю бесідувала в своім рефераті Жофія Чорі з Мукачівского Університету. Доповід о памятных місцях на Словациі выголосила спілробітничка Дослідничого Інституту ім. Антония Годинкы – Іріна Сюч-Ворінка. Янош Ґашпар, председа Кураторской Рады Мадярского Фонду Культуры Громадного Транспорту, в своім выступліню бесідувал о русиньскых памятных місцях в Польщы, Войводині і на Мадярах.

Нова президентка Мадяр зачала свою президентуру од благословліня 

В суботу, 14. мая, в Будапешті одбыла ся інавґурация новой мадярской президенткы Каталін Новак. Єст то перша жена при функциі президента Мадяр і єдночасно наймолодша голова державы в істориі. Каталін Новак інавґурацию зачала нетрадицийно, бо од екуменічного богослужыня, котре одбыло ся в Костелі Реформуваной Церкви на Пляци Кальвіна в Будапешті. Головным служытельом был Золтан Балоґ, председа Конференциі Мадярской Реформуваной Церкви, якій підкрислил, же то был першый раз, коли римокатоликы, грекокатоликы, євангеликы і реформуваны разом з молитвом Жыдівской Реліґійной Громады просили о Боже благословліня для головы державы. Представникы християньскых церкви окремо благословили нову президентку. Медже нима были тіж представникы грекокатолицкой і православной церкви. По екуменічным богослужыню торжественна подія проходила перед будинком мадярского парляменту, де Новак была святочно інавґурувана і де мала своє інавґурацийне выступліня.

«З лемківском нутом і смаком – свобідны од залежности»

Ґмінный Осередок Культуры в Команчы просит на дальшу уж стрічу в рамках проєкту «З лемківском нутом і смаком – свобідны од залежности». Тым разом стріча тыкала буде музичной темы. В проґрамі находят ся варштаты з Мариянном Яром і наука лемківскых пісен з ансамбльом Лем-мы з Команчы. Стріча пройде в четвер, 19. мая, о 17.00 год. в Осередку Культуры в Щавным. Вступне дармо, обовязує єднак скорша резервация місц. Більше дрібниц находит ся на сайті Ґмінного Осередка Культуры в Команчы.

В Мацині скінчат ся проблемы з засягом

Ґміна Санкова поінформувала, што по долгых старанях і бесідах полномічный компаніі PLAY звернул ся до Ґорлицкого Старосты з просьбом затвердити проєкт будовы стациі мобільной телефоніі на єдній з ділянок находячых ся в Мацині Великій. Цілю новой інвестициі єст выелімінувати цифрове выключыня на обшыри ґміны. На подібны інвестициі ждут жытелі сел Бортне, Бодакы, Сяры і Рыхвалд.

fot. Henryk Bielamowicz