Сумар дня на 17. мая 2024 р.

Приносиме вам сумар медияльной ґрупы ЛЕМ.фм+ на ден 17. мая 2024 р.

Вмерла лавреатка Преміі Александра Духновича – Наталия Канюх

Як інформувала аґентура Рутенпрес, 14. мая – маючы 74 рокы – вмерла Наталия Канюх, русиньска поетеса, перекладачка, писателька. Наталия Канюх, з дому Гербут, народила ся в 1950 р. в Ґосподинцях, днес Сербія. Студиювала югославяньску літературу на Університеті в Новым Саді. В русиньскій літературі была присутна од молодых років і в вельох областях. Зачынала як редакторка літературного додатку ґазеты Рускє Слово пн. ”Літературне слово”, была поетесом, есеістком, критичком літературы і перекладачком та рецензентком многых русиньскых выдань. Писала і пєсы для діти, ци сценариі для телевізиі і радия. Выданы были дві єй книжкы: збірник поезиі пн. ”Виривок” і поема пн. ”Дом мур брудна рика мост”. Наталия Канюх двараз здобыла Нагороду часопису Шветлосц за найліпшый твір. В 2011 р. остала лавреатком Преміі Александра Духновича за русиньску літературу. Наталия Канюх буде похоронена 18. мая в Новым Саді. Вічная памят!

Ніч Музеів в Музею Русиньской Культуры в Пряшові

Заран, в суботу 18. мая, одбуде ся Ніч Музеів. В рамках подіі своі принагідны выставы вкаже тіж Музей Русиньской Культуры в Пряшові. Цикль подій зачне ся уж о 13.00 год. в музейных просторах. О 15.00 год. выступит Домініка Новотна і ФА Полонина, а вкажут традицийне чепліня молодиці. Буде тіж дашто присвячене Енді Варгольови, а і дальшы акциі, якы в тот вынятковый ден будут вказаны в русиньскым музею. Проґрам найдете на сайті Музею Русиньской Культуры в Пряшові.

Меджепоколіньова стріча в Польковицях

Бургомайстер Польковиц Вєслав Вабік і Польковицка Рада Жен просят на меджепоколіньову стрічу, яка пройде заран, в суботу 18. мая в Містецкым Парку. З ініцийятивом орґанізациі меджепоколіньовых стріч на свіжым повітри, котры мают інтеґрувати жытелів ґміны, вышли членкыні Польковицкой Рады Жен. Ініциятиву сперло вельо єдиниц і інституций з обшыри ґміны, котры прирыхтували з той нагоды вшелеякы атракциі, будут м.ін. анімациі для наймолодшых, гры і забавы о безпеці, ведены функцийонерками Містецкой Стражы, спотровый тор з перешкодами од спортового кюбу Ґурнік Польковиці, тренінґы для жен, спортовы конкуренциі для сеньорів і лікуючы масажы. Буде і чытальничый кутик. Стріча пройде заран в годинах од 10.00 до 13.00.

Русиньскій Фестіваль в Свиднику

Припоминаме, што уж в тот понедільок, 20. мая, рушат 12. річник Фестівалю Культуры Русиинів Словациі в Свиднику – Русиньскій Фестіваль. Головным орґанізатором є Окресна Орґанізация Русиньской Оброды в Свиднику. Орґанізаторы зас приготовили проґрам на цілый тыжден – фестіваль потырват до неділі 26. мая. Од понеділька до четверга будут проходити ріжного рода товаришучы акциі. В пятницю зачне ся головна част фестівалю – в свидницкым амфітеатрі, і потырват до неділі. В тым часі буде тырвал тіж 5. річник Фестівалю Орфеус – музичного перегляду авторской русиньской творчости. Окрем ПУЛЬС-у, выступлят тіж м.ін. Владислав Сивый, Кандрачовці. Неділя буде належала головно домашнім колективам і гостям, і буде переважно в фольклорным духу. Вступне на фестіваль мож придбати на сайті www.rusinskyfestival.sk.