Сумар дня на 17. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 17. жолтня/октобра 2025 р.

Вмерла Теодозия Латтова

З жальом інформуєме, што 16. жолтня/октобра перестало бити серце Теодозиі Латтовой, професийональной русиньской радийовой редакторкы, журналисткы, писателькы, культурно-освітньой діячкы. Вмерла маючы 76 років. Більше о б.п. Теодозиі Латтовой прочытате на нашым портали. Похоронны обряды одбудут ся в понедільок 20. жолтня/октобра в Пряшові.

Закрыта дорога з Крениці до Тылича

Утрудніня для шоферів на трасі з Крениці до Тылича. Ремонт повітовой дорогы в Креници тырват уж од понад місяця. Дотля была єднак переіздна – на одтинках, де проходили працы, обовязувал наперемінный рух. Тепер дорога буде закрыта. То в звязку з будовом сіти дощовой і санітарной канализациі і водопроводной сіти. Одтинок ул. Пулаского єст закрытый од середы. Першый етап робіт завершыт ся днес о 16.00 год. Дальшый етап прац буде долшый. Дорога буде закрыта 10 дни – од год. 8.00 в понедільок 20. жолтня/октобра до год. 16.00 в середу 29. жолтня/октобра. Тоты, котры хотят переіхати з Крениці до Тылича, можут скорыстати з обізду через Поворозник або воєвідском і державном дорогом через Мохначку Выжню і Нижню.

Тырват акция вакцинациі лишок

Вчера в Малопольщы рушыла акция вакцинациі лишок. Інформувал о тым інспекторат ветеринариі в Кракові. Вакцины проти встеклині сут розмітуваны в лісах, на полях, луках і в парках. Вакцина має форму бронзового диску або кубика, з притігаючым звірята запахом. Треба памятати, же кєд найдеме таку вакцину, не мож єй дотыкати. Акция в Малопольщы потырват до 24. жолтня/октобра. В часі єй тырваня, як і через два тыжні по єй завершыню, т.є. до 7. лисопада/новембра включно, не мож выпущати без опікы псів і котів, а в часі прогульок псы мусят быти на мотузку і в наморднику. Така сама акция прошла і на Підкарпатю. В тым реґіоні не повинно ся выпроваджати домашніх звірят на незабудуваны терены до 25. жолтня/октобра. Цілю успішного і безпечного проведіня вакцинациі лікарі просят жытелів о достосуваня ся до рекомендаций, а родичів і опікунів о переданя тых інформаций дітям. Як подали малопольскы ветеринарийны службы, чысло припадків встеклины завдякы вакцинациі зменшыло ся в реґіоні до зера. В 2010 р. однотувано іх 118, рік пізнійше 60, а остатній припадок записаный был в 2018 р.

О русиньскій культурі на Фестівали Alterity Minority 2025

Днес в Пряшові зачынат ся Фестіваль Alterity Minority 2025, што пропаґує культуру русиньской і ромской нацийональных меншын. В рамках фестівалю обудут ся дві модеруваны бесіды. Перша з них буде тыкала ситуациі Ромів на Словациі – того, як собі радят, якы мают проблемы і што треба зробити, жебы успішнійше творити спільне соспільство. З Барбором Ботошовом, представничком ромской меншыны бесідувал буде Петро Медвідь. Друга бесіда буде пробом одповісти на звіданя – што зробити, жебы русиньска культура, котра пережыват тепер свій ренесанс по одроджыню з 1989 рока, перетырвала? Бесідувати будут Петро Штефаняк і Домініка Новотна, модерувал Петро Медвідь. Бесідам товаришыти будут концерты. В пятницю запрезентує ся Барбора Ботошова Банд, а в суботу русиньскій Calibri Gang. Подіі будут проходити в пряшівскій кавярни Хрістянія днес і в суботу од 18.00 год.