Сумар дня на 18. червця/юнія 2025 р.

Приносиме вам сумар медияльной ґрупы ЛЕМ.фм+ на ден 18. червця/юнія 2025 р.

Архієрейскє богослужыня в Святковій

Традицийно уж в другу суботу червця/юнія на граници Святковы Великой і Розстайного одслужена была православна Божеска Літургія при капличці, яка є локальным памятником Собору Мучеників Холмскых і Підляшскых, а окремо і священномученика Павла (Швайко) та мучениці імости Йоанны, якы перед тым, як пішли на Холмщыну, несли свою послугу серед православных вірных на Лемковині. Вірны на молитві зобрали ся в суботу 14. червця/юнія. Богослужыня зачали ся з малого освячыня воды, якє завершыл в капличці о митр. Юлиян Феленчак з Морохова. Капличка, о якій бесіда, належыт до православной Церкви і є памятком архітектуры. То попри ній, перед парома десятлітями, громадили ся вірны на богослужынях, якы справлял о. Павел Шайко в меджевоєнным періоді для православных Лемків. Суботню літургію очелювал архієпископ перемышльско-ґорлицкій Паісий, при участи духовенства ґорлицкого, креницкого і саноцкого деканатів. Співал хор під дириґентуром Мариянны Ярой.

Хто розпознат Лемків на знимці?

Стоваришыня Саґа Ґрибів раз іщы звертат ся з закликом о поміч в розпознаню осіб на знимці, якы найдут ся на муралю, котрый рыхтує артиста Аркадиюш Андрейков. Мураль малюваный є на стодолі в Білій Нижній недалеко ґрибівского дворця. Там, в 1947 році Ян Свідерскій принял до себе і ночувал лемківску родину, яка ждала на выселіня. Знимку з цілом громадом – Лемками і польскым ґаздом, заховал його внук Юзеф Свідерскій, якій заініциювал намалюваня упамятняючого муралю на своій посесиі. То уж другій мураль, якій реализує Саґа Ґривів, котрый припоминат лемківску історию. Першый был намалюваный во Фльоринці. Кєд не поведе ся зідентифікувати осіб зо знимкы, мураль буде символичным упамятніном вшыткых Лемків, жертв насильной акциі «Вісла», якы ждали на выгнаня як раз на ґрибівскым дворци. Там зганяли Лемків з Фльоринкы, Вавкы, Білцаревы, Боґушы, Королевы, Бересту, Полян, Брунар, Ставишы, Перункы, Чырной, а тіж з Мохначкы і Поворозника. Знимку долучаме до днешнього Сумара дня публикуваного на портали лем.фм.

Бадач лемківской штукы Михал Шымко зо ступньом доктора!

Приємно нам заявити, што лемківскій дослідник Михал Шымко, успішні оборонил свою дисертацию. Оборона докторской розправы одбыла ся в минулу пятницю 13. червця/юнія. Михал Шымко оборонил докторат до темы «Сучасна лемківска штука: достоменніст, памят, естетика». Його робота обнимат шыроку анализу творчой, артистичной, культурной і соспільной діяльности сучасных артистів, котры ідентифікуют ся з лемківском спадковином. Згромадил і омовил роботу парудесятьох артистів, в векшости незнаных, з Польщы, Словациі, Украіны, Сербіі ци Канады. Іх артистична діяльніст была потрактувана не лем як естетична експресия, але тіж форма трансмісиі достоменности, медиюм ґруповой памяти і нарядя неґоциюваня етнічной приналежности. На тым етапі ступін доктора для Михала Шымко то уж лем процедуральна формальніст. Його робота отримала три позитивны науковы рецензиі. Михал Шымко єст абсольвентом істориі штукы, украіністикы і документалистикы Варшавского Університету. Докторат зреализувал на Університеті ім. М. Кюрі-Склодовской в Люблині. Його доробок то парунадцет науковых дописів, в тым до «Річника Руской Бурсы», та веце як 20 выступів на конференциях. В минулым році был студентом Медженародной Літньой Школы Русиньского Языка і Культуры Studium Carpatho-Ruthenorum на Пряшівскым Університеті. Ґратулюєме!

Терочка заспіват в Высовій

Бурсяный ансамбль Терочка запрезентує ся в амфітеатрі в Высовій. Выступ одбуде ся в рамках гостины на повитаня літа в Здройовым Парку в Высовій уж в найблизшу суботу 21. червця/юнія о годині 15.30. Сердечні запрашаме підперти свойом присутністю молодшых членів ансамблю.