Сумар дня на 18. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 18. грудня/децембра 2025 р.

Ельпіс ратує дальшы стары книгы

В посліднім часі закінчыла ся консерваторска робота над штырьома церковныма стародруками з колекциі Єпархіяльного Осередка Православной Культуры «Ельпіс». Під опіку консерваторів трафили штырі книгы выдрукуваны в часі І Польской Республикы та в ХІХ ст. Найстаршом з книг была Євaнгелия з 1665 рока, выдрукувана во Львові в друкарни Михала Сльозкы, походжыня книгы – Чернілова (яворівскій повіт). Другом книгом был Октоіх з 1671 рока, так само выдрукуваный во Львові, книга походит з Білянкы. Дальше, консервациі была піддана Tріод Квітна – Пятдесятниця з 1688 рока (незнане походжыня) та Ірмолоґійон з 1858 рока, з Ріпок, выдрукуваный через друкарню знаного львівского Ставропіґійского Інституту. Ельпіс консеквентні реализує долготермінову стратеґію охороны церковного писменництва. Дотепер зроблено консервацию 47 стародруків. Закінчыня тогорічного етапу робіт не єст фіналом, а черговым етапом стараня о материяльну спадковину Церкви.

Владыка Йона Максим поблагословил колядників

В неділю 14. грудня/децембра одбыла ся в пряшівскым Катедральным Соборі св. Йоана Крестителя Божеска літургія получена з посланьом колядників Доброй новины. Торжественну літургію одправлял пряшівскій архієпископ і митрополита кыр Йона Максим. На кінци поблагословивл вшыткы діти і молодіж, котры вчас різдвяных свят будут колядуваньом оголошати радістну новину о народжыню Ісуса Христа. Вызбераны колядниками грошы підут на підпору гуманітарных і розвитковых проєктів в субсагарскій Африці. По богослужыню владыці колядницкій выступ дали діти і молодіж з парохіі Чырч.

Епіфан Дровняк в Вадовицях

В Папскым Музею в Вадовицях мож видіти в тым часі нову выставу творчости Епіфана Дровняка – Никыфора. На двох музейных поверхах розміщено в сумі 40 образів. Головна тема експозициі то «тепло родинной хыжы», кєд же більшіст з презентуваных творів то представліня м.ін. середины хыж, кухні, але так само сут м.ін. міста ци колейовы стациі. Выстава буде доступна до 26. лютого/фебруара. Хоц Музей посвяченый є папі Йоанови Павлови ІІ, як раз презентує він і творчіст повязану зо світскыма артистами.

Выняткова выстава – неодолга в Варшаві

«Формы присутности. Штука Лемків / Карпатскых Русинів» – так звучыт наголовок часовой выставы, яка презентувана буде од 17. січня/януара до 30. червця/юнія 2026 р. в Державным Етноґрафічным Музею в Варшаві. Єст то перша так шырока презентация артистичного доробку Лемків / Русинів, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША. Як подає орґанізатор выставы, Державный Етноґрафічный Музей, порушат она вельорічну тишу і вказує выключыня присутне в істориі інституцийонального приниманя штукы. Вказує, же спадковина Лемків / Карпатскых Русинів не вертат, але фурт тырват, мимо проб єй анулюваня і асиміляциі, як жывый елемент сучасной культуры. Куратором выставы єст др Михал Шымко, а серед медияльных патронів находят ся ЛЕМ.фм і Стоваришыня «Руска Бурса» в Ґорлицях.