Сумар дня на 18. липця/юлия 2025 р.

Приносиме вам сумар медияльной ґрупы ЛЕМ.фм+ на ден 18. липця/юлия 2025 р.

Польскій Парлямент схвалил уставу о зміні меншынового закону

Вчера, 17. липця/юлия Сенат Польской Республикы принял схвалену Соймом 9. липця/юлия тр. уставу о зміні закону о нацийональных і етнічных меншынах та о реґіональным языку, котра передвидує, же «мериторичну і адміністрацийну обслугу входячых в склад Спільной Комісиі представників меншын і представників соспільности хоснуючой [реґіональный] язык, в тым спілведучого Спільной Комісиі, будучого представником тых меншын і соспільности, запевнят Канцелярия Сойму». Тепер схвалена парляментом устава трафит до підпису до Президента Польской Республикы Анджея Дуды.

Грекокатолицкы торжества на Святій Горі Явір

Днес проходят грекокатолицкы торжества на Святій Горі Явір. Днешнє свято зачынат ся Молебном до Пресвятой Богородиці в каплици на св. Горі Явір о год. 9.30, де пак, од 10.00 год. має проходити архієрейска Літургія. Тогорічны святкуваня для Русинів на Лемковині будут о тілько вынятковы, што богослужыня очелит Высокопреосвященный Йона Максим, пряшівскій грекокатолицкій архієпископ і митрополита при сослужыню другых єпископів та священників з Польщы. По служыню на Яворі, о 12.00 год. заплянувано служыня панахіды на цмонтери в Высовій при гробі Фіриі Демянчык, якій перед 100 роками обявила ся Пресвята Богородиця.

Рушат фестіваль русиньской культуры Еха Волчых Гір

Уж днес, 18. липця/юлия, в русиньскым селі Влич на Словациі рушат дальша едиция Фестівалю Еха Волчых Гір. Подія потырват два дни. Фестіваль русиньской культуры в селі Влич є найстаршым фестівальом в сниньскым реґіоні. Його початкы сігают 60. років ХХ столітя. Є святом русиньской культуры, традицийного ремесла і жытя в гармоніі з природом. Фестіваль орґанізуваный єст в унікатным оточыню Нацийонального Парку Полонины, знаного з найтемнійшого неба на Словациі і стародавных буковых пралісів. Цілю Фестівалю єст презентувати, заховувати і славити русиньску культуру з ріжных реґіонів Словациі і заграниці. Богатый проґрам подіі принесе выступліня фольклорных ансамблів, співацкых ґруп, солистів, як і концерты сучасных музикантів, котры інспіруют ся народныма мотивами.

«Од Русаль до Яна» в Музею Лемківской Культуры в Зындрановій

Уж о тыжден, в вікенд 26.-27. липця/юлия в Музею Лемківской Культуры в Зындрановій одбуде ся шторічна подія «Од Русаль до Яна». В рамках суботнього проґраму, од 16.00 год. буде мож м.ін. звидіти Музей Лемківской Культуры в Зындрановій, взяти участ в прелекциях і промоциі книжок. О 18.00 год. зачнут ся выступы ансамблів – Капелі спід Рубані та Гудобной Скупины Алеґро. По концерті буде розпалене огниско. В неділю о 11.00 год. одслужена буде св. Літургія в церкви св. Миколая в Зындрановій, а пак пройде офіцийна част одкрытя свята і концерт. Выступлят: Ленчанє, Серенча, Стропковяне, Стропковчан, Чендеш Орхестра і Капеля знад Ославы. Окрем того заплянувано другы атракциі, такы як показы ремесла і конкурсы. Подія была дофінансована з середків Міністра Внутрішніх Справ і Адміністрациі, Міністра Культуры і Нацийональной Спадковины та з середків ґміны Дукля.