Сумар дня на 18. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 18. листопада/новембра 2025 р.

Юлия Дошна і Івона Іскра-Криницка просят на підсумуваня стипендияльного проґраму «Мастер і ученик»

Проґрам «Мастер і ученик». веденый єст Нацийональным Інститутом Культуры і Спадковины Села. До проґраму могли зголошувати ся народны творці, артисты, музикы і выробникы ручной роботы, котры під опіком мастерів досконалили своі таланты. Цілю єст підтримувати локальны традициі і знаня та продолжати творчіст. Особливо важным аспектом єст підпора здібности загороженых втрачыньом. Того рока до конкурсовой комісиі вплынуло понад 230 внесків. Серед 27 выріжненых пар нашли ся Юлия Дошна і Івона Іскра-Криницка, з проєктом наукы лемківскых пісен. Результаты паромісячной спілпрацы будут презентуваны в часі стрічы, котра пройде 21. листопада/новембра о 18.00 год. в Майстерни Карпат в Санковій. Стипендисткы запрезентуют выбраны пісні та оповідят тіж, як выглядали спільны варштаты і якы сут іх одчутя по закінчыню проґраму.

Цифровый архів ґміны Устя Рускє – Ґмінный Осередок Культуры просит на стрічу посвячену одкрытю соспільного цифрового архіву

Ґмінный Осередок Культуры в Устю Рускым та Фундация Memo просят на дві стрічы звязаны з одкрытьом соспільного цифрового архіву ґміны Устя Рускє. На стрічы мож буде послухати о тым, чым єст соспільна архівістика, што то єст бесідувана істория і чом вартат нагрывати спомины своіх близкых та як дбати о домашній архів. То выняткова нагода, жебы дознати ся, як заховати спомины для будучых та зачати свою пригоду з архівізацийом. Бесіду поведе Реґіна Паздур, етноґрафка і архівістка. Подія пройде 21. листопада/новембра в Ґмінным Осередку Культуры в Устю Рускым. Перша стріча зачне ся о год. 16.30, а друга о 18.30. Вступне дармо. Орґанізаторы заохочают, жебы забрати зо собом родину і знаємых, а особливо старшы особы.

«Малопольскій Двір – зелена однова і одбудова забытків та адаптация для новых соспільно-господарчых функций»

Музей Дворы Карвациянів і Ґладышів в Ґорлицях отримал дофінасуваня на проєкт «Малопольскій Двір – зелена однова і одбудова забытків та адаптация для новых соспільно-господарчых функций». Його цілю єст охорона, ревітализация і адаптация забытковых дворів до новых соспільно-культуровых функций. Проєкт закладат інвестицийны і едукацийны діяня. Участ в ним бере іщы 5 інституций з малопольского воєвідства: Музей Сандецкой Землі, Музей Тарнівской Землі, Археолоґічный Музей в Кракові, Музей Оравскій Етноґрафічный Парк в Выжній Зубжыци, Музей Західньой Малопольщы в Выґєлзові. Загальна реализация проєкту зачала ся уж в 2023 році, але головны діяня плянуваны сут на част од листопада/новембра 2025 рока до червця/юнія 2028 рока. Каждый з партнерів реализує діяня в рамках выбраного обєкту. Музей Дворы Карвациянів і Ґладышів отримане дофінасуваня перезначыт на адаптацию дворского ансамблю в Шымбарку до выставенничо-культуральных функций. Отриманы середкы дозволят тіж провести модернізацию постійной выставы в Дворі Карвациянів в Ґорлицях.

Плястичный конкурс «Карпатскы Сторожы Природы»

Стоваришыня для Розвитку і Промоциі Підкарпатя просит до участи в плястичным конкурсі «Карпатскы Сторожы Природы». Конкурс направляный єст на учеників основных шків з малопольского, підкарпатского і шлезского воєвідств. Задачом єст зрихтувати плястичну працу інспірувану природом Карпат. Роботы мож высылати до 28. листопада/новембра на адрес Стоваришыня. Для лавреатів і выріжненых орґанізаторы зрыхтували нагороды. Дрібниці і реґулямін конкурсу находит ся на інтернетовым сайті Стоваришыня для Розвитку і Промоциі Підкарпатя.