Сумар дня на 18. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 18. лютого/фебруара 2022 р.

Сильный вітер іщы до кінця тыжня

Од вчера в цілій Польщы дує сильный вітер. Оркан Dudley од самого рана нищыл будинкы і дерева. Як інформували пожарникы з Ґорлиц і околичных єдиниц Охотниой Пожарничой Стражы, поламаны дерева усували з ґмінных і повітовых доріг м.ін. в Ропици Рускій, Быстрій, Климківці ци Ганчовій. Забезпечали тіж по части зорваны або ушкоджены стріхы, примірно в Ґорлицях і Ставишы. Немалы страты вітер спричынил і в новосандецкым повіті. Пожарникы та енерґетикы інтервеніювали при поламаных деревах, ушкодженых будинках ци зорваных енерґетичных леніях. В некотрых місцях бракло світла або електричной енерґіі. В парох гірскых курортах закрыты были атракциі, такы як нп. ґондольова колейка в Креници. Подля проґноз Інституту Метеоролоґіі і Водной Господаркы, сильный вітер і ледова покрыва можут ся утримувати аж і до неділі. В новым погодовым комунікаті Бєщадского Нацийонального Парку працівникы не рекомендуют выходити в горы до кінця того тыжня.

В Креници загостят Европейскы Ігры

Уж о рік в Малопольщы мают ся одбыти Европейскы Ігры, в якых змагало ся в 24 дисциплинах буде ок. 5 тис. найліпшых спортовців Старого Континенту. Велика спортова імпреза, яка має проходити од 21. червця/юнія до 2. липця/юлия, загостит м.ін. в Креници. Як заповіл председа спілкы Европейскы Ігры 2023 Міхал Ланґер, спортова подія буде гостила в Креници два тыжні. На креницкій Парковій Горі зорґанізуваны будут бігы і змаганя на роверах МТБ, а в Ледовій Галі пройде Чемпіонат Европы в Джудо, Карате, і быти може Май Тай. В звязку з тым місто має в плянах шор інвестиций. Выремонтувана має быти Ледова Галя, одновлены і освітлены трасы на Парковій Горі, выремонтуваны некотры улиці і водны резервуары. В Креницю має быти заінвестуваных ок. 50 млн злотых. Як повіл бургомайстер Крениці Пьотр Рыба, для міста то неповторна шанса на промоцию, розвиток і поправу стану спортовой інфраструктуры.

Новы інвестициі в Тыличы

Як поінформувал на своім фейсбуковым сайті бургомайстер Крениці Пьотр Рыба, в рамках збільшаня туристичной атракцийности Тылича плянуют поставити новый, стильовый автобусовый пристанок на тылицкым рынку та одбудувати забыту студню, яку колиси хоснували жытелі. Проєкты были уж заакцептуваны консерватором памяток, актуалньно сут на етапі зголошуваня до Повітового Староства. В найблизшым часі будут внескувати о дофінансуваня задач.

Концерт в річницю смерти Юрия Новосільского

Уж в тоту неділю, 20. лютого/фебруара, одбуде ся концерт церковной музикы в 11. річницю смерти Юрия Новосільского. Подію орґанізує Музей Ікон в Варшаві. «Гымны і пісні Православной Церкви, похоронны і за помершых» заспіват мужскій ансамбль церковной музикы Катапетасма, під дириґентуром Лукаша Гайдучені. Концерт одбуде ся в музейній каплици при ул. Лелеховскій 5 о 19.00 год.