Сумар дня на 18. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 18. лютого/фебруара 2026 р.

Уж є! Уж мож купити! Єдиный такій – «Контекстуальный словник лемківского языка» під ред. проф. Олены Дуць-Файфер

Як поінформувал выдавця – Академіцка Книгарня в Кракові, уж є доступный в книжковій, выдрукуваній версиі «Контекстуальный словник лемківского языка» під ред. проф. Олены Дуць-Файфер. Тото двотомове выдавництво чыслит: 1154 страны – першый том і 1217 стран – другій том. Грубіст обох книжок то аж 16 центиметрів упорядкуваного лексикального ресурсу. Каждe госло має примір з джерельных текстів і ґраматичный опис. Робота над словником тырвала близко 11 років і было в ню заанґажуваных веце осіб, як тіж ріжны ґрантодавці – в тым індивідуальны особы та ріжны інституциі. Авторы госел працували на корпусі лемківскых текстів, анализували значыня слів в іх натуральным культурным контексті. Проєкт вымагал одступліня од схем домінуючого языка і творіня дефініций, котры оддавати будут духа Лемковины. Словник єст ділом активных хоснувателів языка і має підперати його сучасну жывотніст і дальшу ревітализацию. Публикацию мож купити на сайті akademicka.com.pl.

В Вілямовицях будут святкувати Ден Материньского Языка

Ближыт ся Ден Материньского Языка. Як традицийні – святкуваня орґанізує вілямівска спільнота – хоц мало чысленна, то незвыклі активна в ревітализациі і в плеканю свойой культуры і языка. Активістам, при підпертю наукового середовиска Варшавского Університету, повело ся аж і довести до побудуваня і возникніня Музею Вілямівской Культуры в Вілямовицях і то як раз тота інституция є тогорічным орґанізатором свята. 10. едиция Дня Материньского Языка одбуде ся в суботу 21. лютого/фебрурара, в проґрамі подіі є м.ін. презентация найновшых публикаций в вілямівскым языку, три прелекциі посвячены языкам і языковій політиці та премєра комедиі в вілямівскым языку «Цуґ уф Він» драматичной ґрупы «Уфа фіса». Вступне на цілу подію дармо.

Вітражы Новосільского по комплексовій консервациі

Девятнадцет цінных вітражів проєкту Юрия Новосільского было комплексово одремонтуваных і тым самым – выратуваных. Вітражы находят ся в варшавскым храмі Божого Провидіня в Весолій і сут частю проєкту прикрашыня цілой середины костела. Артиста зреализувал сес проєкт в 70. роках ХХ столітя. Вітражы мают барз просту ґеометричну форму, а схоснувана кольористика то: синій, червеный, жолтый, помаранчевый та прозрачный. Іх однова прошла двоетапово – першу част піддано консервациі в 2024 році, а другу закінчено в минулым. Занято ся не лем вітражами, але тіж консервацийом поліхромій, авторства Новосільского. Сорок років тому артисті помагали: молодый фільмовец Павел Ружевич, маляр Мілош Бенедиктович, студенты і місцева молодіж, в тым будучый консерватор памятників Павел Садлей. Вітражы зробила артистка Тереса Реклевска. В 2004 році, зараз по влучыню Весолой до Варвашы, інтерєр храму вписано до реґістру памятників, а в 2019 році в реґістрі нашол ся цілый костел разом з цмонтерями.

Др Люба Кральова з прелекцийом в рамках 63. наукового семінару карпаторусиністикы

О два тыжні, 4. марця о 10.00 год. одбуде ся 63. науковый семінар карпаторусиністикы, котрого орґанізатором є Інститут Русиньского Языка і Культуры Пряшвіского Университету. З доповідю на тему: «Специфічны проблемы языковой і народной саморефлексиі Русинів в минулости і сучасности» выступит др Люба Кральова. Прелекцию буде мож выслухати тіж онляйновом дорогом. Вчас подіі одбуде ся так само презентация книжкы під тым самым наголовком авторства прелеґенткы.