Сумар дня на 18. січня/януара 2024 р.

Приносиме вам сумар медияльной ґрупы ЛЕМ.фм+ на ден 18. січня/януара 2024 р.

Ден Русинів Сербіі

17. січня/януара в нашым календари є записаный як Ден Русинів Сербіі. Русины на нижній земли припоминают си тот ден як дату, коли в 1751 р. радник Мариі Терезиі – Франц Йозеф де Редль, підписал першый документ о населіню 200 русиньскых грекокатолицкых родин до товдышнього Великого Керестура. Хоц Ден Русинів Сербіі выпадал вчера, так центральны святкуваня будут проходити в найблизшый вікенд (сводібный недільный ден), 21. січня/януара. Сербскы Русины каждого рока орґанізуют святкуваня в інчым селі або місті, в котрым жыют – тым разом в Дюрдьові. В рамках проґраму буде в неділю одкрыта выстава о істориі жывота Русинів у Дюрдьові, а на осму годину вечер є приготовлена святочна академія. Уж вчас Дня Русинів Сербіі, од 17. січня/януара, в Дюрдьові сут завішены русиньскы фаны на будові містецкого уряду, школы і культурного дому. Святкуваня проходят тіж в інчых місцевостях. Вчера такы одбыли ся в Коцурі і Шыді, заран будут в Новым Саді і Суботици, а Сримска Митровиця святкує днес. Заран так само будут святкувати в Кули, Рускым Керестурі, Бачынцях, Бікічы і Новым Орахові. Тогорічны святкуваня закінчат ся 28. січня/януара в Вербасі.

Золотый Ювілей в Польковицях

Місто Польковиці заохочат, жебы пары, якы в 2024 р. будут святкувати 50-літя супружества, зголошували ся до Уряду Цивільного Стану в Польковицях цілю отримати медаль за долголітнє спільне пожытя і взяти участ в специяльній подіі. 50-літя супружества то тзв. Золотый Ювілей – то подія выняткова не лем для ювілярів, але і іх родин і приятелів. Каждого рока ріжны ґміны в Польщы орґанізуют подібні ґалі, на котры запрашаны сут пары, якы од 50 років спільно творят єдніст. Внескы о наданя Медалю за долголітнє пожытя рыхтує Нижньошлезскій Воєвода на основі зголошыня. Пак внескы сут пересыланы до Канцеляриі Президента Польской Республикы, якій признає оцініня.

Нагороды Міста Пряшів

До 28. лютого/фебруара мож посылати пропозициі на лавреатів нагороды Премія Міста Пряшів і Опалове Зернко Міста Пряшів за 2023 р. Номінациі мож заганяти до Містецкого Уряду в Пряшові або через електронічну почту. Премія міста Пряшів є публичном нагородом, котру уділює місто Пряшів фізичным особам, юридичным особам і колективам за вынятковы творчы діі і долголітній вынятковый вклад для розвитку міста во вшыткых обшырях общественного, господарского і культурного жытя. Опалове Зернко Міста Пряшів уділює ся найбарже успішным подникательскым субєктам, котры діют на териториі міста. Більше інформаций о номінациях мож найти на сайті міста Пряшів.

Шедрый Вечер!

А на конец хочеме желати вшыткым тепер святкуючым праздник Богоявліня Господнього – смачной і пахнячой велиі. Днес Щедрый Вечер – вінчуєме, жебы заранішній Йордан был продолжыньом радістного різдвяно-новорічного празднуваня. Згідно з давном традицийом, вшыткы довєдна ходиме на поблизку ріку і святиме йорданьску воду. Так певно буде і заран в дакотрых нашых селах на Лемковині, де тоты звыкы фурт жыют. З нагоды днешньой святой вечері і заранішнього праздника Богоявліня желаме Вам вшыткого найліпшого!