Сумар дня на 19. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 19. грудня/децембра 2025 р.

Андреа Предайньова одкликана з функциі ґенеральной директоркы СНМ

Андреа Предайньова была одкликана з функциі ґенеральной директоркы Словацкого Нацийонального Музею. Рішыня о звільніню мала одобрати з Міністерства Культуры Словацкой Республикы в середу 17. грудня/децембра, на єй особистый внесок. До функциі была Предайньова выбрана лем в маю тр. По своім наступліню до функциі одкликала дакількох директорів нацийональных музеів, включно директорку Музею Русиньской Культуры Любу Кральову. Повіреным директором русиньского музею менувала Яна Пивоварника, особу без компетенций на тоту фунцию. Підчас засіданя Палаты нацийональных меншын Рады Влады Словацкой Республикы про нацийональны меншыны непокій з ведіньом свого музею высловили представникы хорватской, украіньской і русиньской меншын. По одкликаню Предайньовой міністерка культуры Мартіна Шімковічова заряджаня Словацкым Нацийональным Музейом повірила Вєрославі Бернатовій.

Фінісаж выставы пн. «Лемківскы хыжы на Шляхтівскій Руси»

До кінця того місяця в Пєніньскым Музею в Щавници, одділіню Музею Сандецкой Землі, мож обзерати выставу тыкаючу будівництва Шляхтівскых Русинів. Выстава з назвом «Лемківскы хыжы на Шляхтівскій Руси» презентує архівальны фотоґрафіі хыж, загорід, церкви і придорожных крестів. Ціліст дополняют описы типів будівництва, материялів, покрытя і інтерєрів обєктів – розкладу поміщынь, выпосажыня ци прикрас. Выставу мож іщы обзерати до 31. грудня/децембра тр.

«NOWOSIELSKI Audiovisual» – мултімедияльный концерт в Ґданьску

Музей ІІ Світовой Войны в Ґданьску просит на мультімедияльный концерт інспіруваный творчістю Юрия Новосільского. Концерт одбуде ся в просторах Музею в суботу 10. січня/януара. Білеты сут доступны на інтернетовым сайті інституциі. В проєкті Артура Дуткєвича пн. «NOWOSIELSKI Audiovisual» малярство артисты єст інспірацийом до представліня творів о контемпляцийным характері на джазове тріо: фортепіян, контрабас і перкусию, котры лучат зо собом елементы імпровізуваной, модерной, клясичной музикы і джазу. Композициі, подібні як штука Новосільского, сут оперты на традициі сходу і заходу. Музиці товаришат зсинхронізуваны зо звуком коляжы і візуализациі з фраґментами образів Юрия Новосільского в формі великоформатовых відеопроєкций, творены нажыво візуальным артистом Анджейом Вонсіком. Концерт был уж презентуваный м.ін. в Варшаві, Кракові, Вроцлаві і другых містах. Мимо того, каждый выступ ріжнит ся од попереднього – залежно од простору змінят ся дунаміка джазовых композиций , а візуализациі – фраґменты образів Новосільского сут міксуваны в безпосередній кореляциі зо звуком.

Просиме до Руской Бурсы в Ґорлицях

Стоваришыня «Руска Бурса» в Ґорлицях запрашат на дві послідні тогорічны подіі. Перша з них одбуде ся уж заран, в суботу, 20. грудня/децембра. Будут то варштаты прикрасок на яличку, не треба нич зо собом брати – материялы будут чекати на місци. Початок варштатів в само полудне, зараз по пробі дітячого ансамблю Терочка. Друга подія то традицийна велийна стріча, яка проходит все кінцьом грудня/децембра. Для части буде то уж третій ден свят, а для некотрых – фурт іщы передсвяточный період. Без огляду на термін святкуваня – прошены сут вшыткы – ждати будут на вас клясичны смакы – кєселиця, грибы, горох, фізола, перогы. Перед гощыньом выступут Терочка, а пак просиме на спільне колядуваня. До бурсы мож приходити уж од рана в суботу 27. грудня/децембра, а выступ Терочкы і госитна заплянуваны сут на 16.00 год.