Сумар дня на 19. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 19. листопада/новембра 2025 р.

Koлекция Русинка Анны Мариі Зиґмунт, ансамбль Ластівочка і выстава Никыфора – в Любіню в найблизшых днях

Слідом минулого рока Центр Творчого Діяня в Любіні просит на подію «Лемкы в Центрі» – є то ініциятива, котрой цілю є представити лемківску культуру, язык і звыкы шыршій соспільности. В рамках подіі уж в найблизшу пятницю 21. листопада/новембра в Ґалериі Cuprum Arena одбуде ся показ моды авторства Анны Мариі Зиґмунт – буде мож видіти колекцию Русинка. По показі в проґрамі подіі єст концерт Лемківского Ансамблю Пісні і Танця Ластівочка. О ден, в суботу 22. листопада/новембра о 11.00 год. о. прот. Богдан Репела буде опроваджал по православній церкви св. Тройці в Любіні. О. Репела вкаже найціннійшы іконы і приближыт історию православной спільноты в реґіоні. А од 24. листопада/новембра в ґалериі Центра Творчого Діяня буде мож обзерати выставу «Никыфор. Феномен саморідного таланту» – першый раз в істориі міста буде презентувана выстава творів Епіфана Дровняка. Выстава буде доступна до обзераня до 19. грудня/децембра.

Студийный выізд на Словацию. в рамках «GOV4PeaCE»

6. листопада/новембра місто Ґорлиці зорґанізувало студийну візиту на Словациі в рамках проєкту «GOV4PeaCE», спілфінансуваного Европейскым Фондом Реґіонального Розвитку в рамках проґраму Інтерреґ Середня Европа 2021-2027. Цілю выізду было зазнаємити участників з примірами охороны, упамятнінь і промоциі культурной і історичной спадковины з періоду І світовой войны по сливацкій страні. В візиті участ брали представникы чысленных орґанізаций і інституций, м.ін. ґміны Санкова, ґміны Ґорлиці, Стоваришыня Ґрупа Історичной Реконструкциі Ґорлиці 1915 та партнеры зо Словациі – з ґміны Нижня Полянка, Клюбу Воєнной Істориі Бескіды і Нацийонального Парку Полонины. Участникы выізду познали шор місц памяти, котры становлят важный елемент спільной спадковины реґіону польско-словацкого погранича, м.ін. музей-ізбу пямти в Нижній Полянці, репліку деревяного костела ци пантеон – місце, якє упамятнят звязаных з І світовом войном. В проґрамі была так само візита в Мікуляшовій, де участникы могли видіти памятник на верху Каштелик і воєнный цмонтір.

Онляйновы Карпатскы Стрічы уж заран – прелеґентом буде др габ. Пьотр Клапита

Kарпатскє Товариство просит на єденадцеты Онляйновы Карпатскы Стрічы. Одбудут ся заран о 19.00 годині, а гостьом буде др габ. Пьотр Клапита. Дослідник буде оповідал о своій науковій роботі, тзн. істориі гісркых зледенінь в Карпатах і еволюциі іх різбы. В обшыри його заінтересувань є тіж тема волошского осадництва. Єст пасийонатом карпатской топоґрафіі, автором веце як 200 панорам з Західніх і Східніх Карпат. Онляйновы Карпатскы Стрічы проходят посередництвом плятформы Zoom в формі вебінариі з рівном трансмісийом на каналі YouTube Kарпатского Товариства.

В Загірю стрітили ся урядникы в рамках партнерского проєкту «Трансгранична подорож в часі з віртуальным монахом»

В пятницю 14. листопада/новембра в Центрі Культуры Foresterium в Загірю одбыла ся стріча польско-словацкых представників туристикы і культуры реализувана в рамках партнерского проєкту «Трансгранична подорож в часі з віртуальным монахом» фінансуваного з проґраму Інрерреґ Польща-Словация 2021-2027. Цілю стрічы было підпертя розвитку трансграничных, зінтеґруваных туристичных оферт, підпертя ролі туристикы і культуры в господарчым розвитку реґіону і причыніня ся до звекшеной соспільной інтеґрациі. В рамках проґраму омовили дотеперішні результаты проєктів і тото, як новы атракциі збогачают оферту реґіону. Єдном з рыхтуваных новости єст цілорічна експозиция з голоґрамом монаха, поміщена в будинку Центра Foresterium. Тот же центр находит ся з розвалинах кармелітаньского монастыря. Важным пунктом стрічы было підписаня взаімной Умовы о спілпрацы, котра додатково підперат вельолітнє партнерство медже польскыма і словацкыма інстуциями, особливо медже Ґміном Загіря а містом Меджелабірці.