Сумар дня на 19. марця 2026 р.

Приносиме вам сумар медияльной ґрупы ЛЕМ.фм+ на ден 19. марця 2026 р.

Ліґницкій суд покарал злодія креста

Ліґницкій Районовый Суд выдал вырок в справі крадежы креста з грекокатолицкой церкви Успініня Пресвятой Богородиці в Ліґници. 30-літній мужчына был засудженый на три рокы взязниці. До крадежы дошло в вересни/септембрі 2025 р., коли справця выліз на дах церкви і одрізал крест з бані, думаючы, же є зробленый зо срібра. По даякым часі крест был знищеный, але выявило ся, же не был з дорогоцінного металю. Суд взял до увагы, же осудженый признал ся до вины і выказал жаль. Єднак шкоды, якы повстали в наслідстві його діянь, оцінено на кількасот тисячів злотыx, а сам чын выкликал великє обуріня серед вірных. Окрем того справця одповідал і за інчы крадежы та нищыня маєтку, в тым інфраструктуры желізниці. Суд узнал, што кара трьох років є адекватна до характеру злочынів.

На переході Вышнє Німецкє – Ужгород часовы ограничыня

На граничным переході Вышнє Німецкє – Ужгород є од вчера частично ограничена робота в товаровым транспорті. Причыном є реґулярне технічне утримуваня і метролоґічне провірюваня дорожных ваг. Робота буде тырвала в часі од 8:00 до 18:00 год. Під час сервісовых прац буде рух перерваный переважно лем в єдным напрямі. Функцийный пас буде означеный дочасным дорожным значыньом. Шоферів транспортовых авт при переході державной границі жадают о збільшену увагу і о дотримуваня тимÿасового дорожного означыня і приказів службодіючых членів – пограничників.

Днешні варштаты в Ґладышові

Днескы в Шкільно-Предшкільным Комплексі в Ґладышові одбывают ся варштаты для діти, котрых орґанізатором єст Стоваришыня «Руска Бурса» в Ґорлицях. Варштаты перезначены сут для діти, котры сут участниками занять з лемківского языка. Підчас першых, з цілого циклю варштатів, діти роблят зіндивідуализуваны взоры на полотняных торбах. Кажду торбу мож сой взяти по варштатах. А о пару дни, в неділю 29. марця в сідибі Руской Бурсы в Ґорлицях одбудут ся одкрыты варштаты малюваня яєц. Початок писанкарскых варштатів о 15.00 год. Стоваришыня «Руска Бурса» забезпечат варены яйця, віск до малюваня і фарбы.