Сумар дня на 19. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 19. вересня/септембра 2025 р.

Зачала ся будова одтинка дорогы S19 медже Дукльом і Барвінком

На Підкарпатю зачала ся реализация єдного з найважнійшых фраґментів експресовой дорогы S19, якій веде до границі зо Словацийом. Будова 18-кілометрового одтинка дорогы медже Дукльом і Барвінком то інвестиция о великым локальным значыню, але і елемент медженародной трасы Via Carpatia, котра звекшыт перепустовіст, безпеку і комунікацийны повязаня Підкарпатя зо Словацийом і дальшом частю Европы. Цілковиты кошты інвестициі сут чыслены на близко 1,9 млд злотых. Векшыну покрыє дофінансуваня проєкту шляку Via Carpatia, што получыт балтийскы державы з полудньом Европы. На одтинку медже Дукльом і Барвінком тырвают рыхтуючы роботы – м.ін. зниманя верств землі, формуваня головной трасы дорогы, усуваня лісовых теренів і розбераня будинків колідуючых з плянуваном дорогом. Одтинок веде через Низкій Бескід, терен о скомпликуваній різбі і ґеолоґіі, зато реалиазция вымагат будовы вельох інжынєрийных обєктів. Запроєктувано 15 естакад, 7 мостів, 4 віадукты і 23 переходы для звірят. Додатково побудуют дороговый узел в Барвінку, сервісовы дорогы, місця контролі поіздів, технічну і еколоґічну інфраструктуру, акустичны екраны і ретенцийны резервуары. Завершыня робіт єст плянуване на ІІ квартал 2027 рока.

Здружыня молоды.Русины выбрало нового председу

Од 11. до 14. вересня/септембра тр. проходил 16. Табір з молодыма по русиньскы в селі Малый Липник, котрый орґанізує обчаньскє здружыня молоды.Русины. В рамках табору традицийно одбыл ся і сойм орґанізациі. Были на ним выбераны новый председа орґанізациі і члены Выконного выбору. Новым председом орґанізациі остал Мафтей Допіряк, якій є і членом президиі Округлого Стола Русинів Словациі, в котрым полнит функцию секретаря. В рамках Табору з молодыма по русиньскы проходил і далшый проґрам – едукацийны активности. Одслужена была і грекокатолицка літургія в церковнославяньскым і русиньскым языку. Дрібниці чытайте на нашым портали.

В Команчы одкрыли Ізбу Памяти

В минулым тыжни в Команчы прошло одкрытя Ізбы Памяти, яка возникнула в рамках трансграничного проєкту Інтерреґ Польща-Словация 2021-2021 пн. «Слідами І світовой войны на польско-словацкым пограничы». Цілковитый кошт інвестициі то близко 220 тис. злотых. Ізба памяти находит ся в одреставруваным будинку давного желізничного дворця. Має лучыти едукацийну, історичну і туристичну функциі, а заєдно упамятнити подіі сперед стох років. Ізба памяти то не лем традицийны ґаблоты. Важным елементом експозициі сут інтерактивны розвязаня – мультімедияльный кіоск, інтерактивны таблиці, мультімедияльны проєкциі вказуючы історию выкопалиск, з якых походят експонаты, ци коды QR ведучы до додатковых материялів. Самоуряд Команчы заявлят, же одкрытя ізбы то лем початок. Експозиция має быти фурт пошырювана о дальшы експонаты і тематичны подіі звязаны з історийом реґіону і І світовой войны.

Джерело фотоґрафіі: gov.pl