Сумар дня на 2. липця/юлия 2025 р.

Приносиме вам сумар медияльной ґрупы ЛЕМ.фм+ на ден 2. липця/юлия 2025 р.

«Горизонт Низкого Бескіду»

Стоваришыня «Руска Бурса» в Ґорлицях зачало реализувати проєкт пн. «Горизонт Низкого Бескіду» фінансуваный з дотациі Урядового Проґраму Фундуш Громадяньскых Ініциятив NOWEFIO на рокы 2021-2030. Цілю той задачы, заплянуваной на 2 рокы, єст опрацувати спійну і основану на соспільных баданях концепцию розвитку Низкого Бескіду як обшыри о вынятковых приметах культурного і природничого краєвиду. Проєкт закладат ідентифікацию основных елементів спадковины – в тым лемківской спадковины – та діаґнозу выкликів і загорозы звязаных з його охороном і загосподаруваньом. Через діалоґ з мешканцями, анализу потреб локальных соспільности та выпрацуваня системовых рекомендаций проєкт має на ціли підперти зрівноваженый розвиток реґіону, основаный на пошануваню істориі, культурной ріжнорідности і еколоґічных цінности, а тіж звекшыти участ місцевых спільнот в процесах приниманя рішынь, котры тыкают формуваня простору. В рамках задачы ведены будут м.ін. баданя опіній мешканців ґмін Санкова і Устя Рускє реализуваны зовнішньом фірмом, зрыхтуваный буде рапорт з баданя, зорґанізувана конференция для урядників з презентацийом результатів баданя ци дебата вшыткых заінтересуваных розвитком Лемковины. О дрібницях будеме постепенно інформувати.

Нова дата беатифікациі священномученика Петра Павла Ороса

Як поінформувала Мукачівска Грекокатолицька Єпархія, Дикастерия до справ Вызнаня Святых офіцияльно рішыла дату беатифікациі священномученика Петра Павла Ороса. Одбуде ся она в селі Білкы на Підкарпатю (в Украіні) в суботу 27. вересня/септембра 2025 рока. Торжественну Божественну літургію з обрядом беатифікациі очелит Його Еміненция Кардинал Ґжеґож Рысь, лодзскій архієпископ, котрый є призначеный Папскым Леґатом про тоту подію. Він так само выголосит декрет од Святійшого Отця о зарахуваню отця Петра Павла Ороса до лику блаженных Католицкой Церкви. Буде то першый раз в істориі Підкарпатя, же чоловек з того реґіону буде выголошеный за блаженного як раз на домашній земли.

Помож порядкувати цмонтір в Радоцині

Початком червця/юнія Стоваришыня Долины зорґанізувало і провело порядкову акцию на цмонтери в Радоцині. Розмонтували елементы старого огороджыня, купили новы жерди, порядкували терен. В найблизшу суботу стоваришыня плянує коруваня жерди і дальшу част ремонту огороджыня цмонтеря. Кажда пара рук буде придатна – стоваришыня сердечні запрашат до спільной роботы на хосен сохраніня лемківской сепульклярной спадковины. Початок робіт о 10.00 год. Орґанізаторы забезпечают нарядя, воду і закускы.

В ґміні Ропа што раз веце ґаздівок прилученых до публичных водопроводных сіти

В минулым тыжни в Ропі одбило ся торжественне одкрытя стациі очыщаня води в ґміні Ропа. Урухомлена ленія може продукувати 26 кубиків воды на годину. Кєд запотрібуваня буде векше – є уж готова друга ленія. Стациі товаришат два резервуары – єден в присілку Пнякы в Климківці, другій з присілку Ліпя в Ропі. Приватны студні высыхают, зато штораз веце мешканців хоче прилучыти ся до ґмінных сіти. Іщы в липци/юлию тр. до водопроводной сіти буде пілученых 50 ґаздівок в Климківці. Будова стациі коштувала близко 17 мнл зл, з чого 8 млн зл походило з буджету ґміны. В подіі одкрытя стациі участ взяли локальны власти, м.ін. війт ґміны Ропа Кароль Ґурскій, радны, шолтысы, а тіж посланкыня Барбара Бартусь і Мирослав Вальонґ – староста ґорлицкого повіту, та двох римокатолицкых священників.

Фот. Stowarzyszenie Doliny