Сумар дня на 2. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 2. жолтня/октобра 2025 р.

Еврокомісарка стітила ся з меншнами в Украіні. Русинів не уняли

Дипломатка зо Словеніі – Марта Кос, котра є еврокомісарком про розшырюваня Еврoпейской Уніі, в понедільок 29. вересня/септембра поінформувала на социяльній сіти X, же зачала свою тридньову візиту в Украіні в Ужгороді стрічом з нацийональныма меншынами. Серед запрошеных гостів не было єднак ниякой русиньской орґанізациі, хоц Русины сут офіцийно узнаны в Закарпатскій Области, помимо неузнаня на державным рівни. Як поінформувал Юрий Шыпович, перед двома тыжнями Русины были участниками інчой стірчы – з представниками Рады Европы, в звязку з процесом моніторінґу імплементациі Рамовой Конвенциі о Охороні Нацийональных Меншын. Еврокомісарка в своім выступліню повіла, што права меншын сут частю DNA Европской Уніі і трактуваны сут барз серийозно. Марта Кос позитивні оцінила крокы Украіны в квестиі леґіслятивы, што тыкат нацийональных меншын в Украіні, але звернула увагу, што провіріньом буде введіня іх в практику. Влада Віктора Орбана має одмінну опінію в тій квестиі і твердит, же Украіна не сполнят вымогів взглядом меншын. Вчас свойой візиты еврокомісарка нияк не бесідувала о невырішеных проблемах Русинів в украіньскій державі, хоц писма в тій справі были высыланы Світовым Конґресом Русинів до предсідателькы Европейской Уніі, так як і одбыла ся стріча з Венецком Комісийом.

В Ропі торжоственно одкрыли водорповод

Вчера в Ґміні Ропа одбыло ся торжественне одкрытя новопобудуваного водопроводу. В подіі участ брали представникы аж державных власти та самоурядникы, а тіж запрошены гості. Присутны были м.ін. посланкыня Права і Справедливости Барбара Бартусь, Староста Ґорлицкого Повіту Мирослав Вальонґ, Станіслав Кашык – Полнимічник Малопольского Воєводы і дальшы. Зреализуваны роботы обнимали будову понад 5 км головной маґістральной сіти, будову понад 8 км дистрибуцийной сіти, і додатковой інфраструктуры. Реализация інвестициі тырвала од січня/януара 2023 рока до початку вересня/септембра того рока. Цілковита вартіст інвестициі вынесла близко 7 млн зл, з чого понад 2 млн зл были вкладом ґміны Ропа, натоміст 4 млн 750 тиц. зл походило з дофінансуваня в рамках проґраму Польскій Лад.

Вапенне буде розбудуване

Ґміна Санкова заінвестує близко 10 млн зл в модернізацию курорту Вапенне. На зламі жолтня/октобра і листопада/новембра оголошеный буде конкурс оферт на будову видокового місця при видоковій вежы на Фердли, з мостом і спацеровом стежком. В плянах єст розбудова амфітеатру, пракінґу та aтракцийной, освітленой фонтанны. Появит ся тіж стрефа одпочынку, pump track, тыролька, а тіж злегшыня для осіб з неполносправностями. Цілістю має возникнути вельофункцийна публична простір для мешканців та курортників. Плянуваный термін закінчыня цілой інвестициі то конец лютого/фебруара 2027 рока. Ґміна рыхтуваня до інвестициі зачала уж в минулым році.