Сумар дня на 20. червця/юнія 2025 р.

Приносиме вам сумар медияльной ґрупы ЛЕМ.фм+ на ден 20. червця/юнія 2025 р.

Ремонтово-консерваторскы працы при деревяній церкви в Ждыни

Як поінформувала православна парохія зо Ждыні, в минулым тыжни зачали ремонтово-консерваторскы працы при памятковій православній церкви Покровы Пресвятой Богородиці в Ждыни. Ремонтово-будівляна фірма під оком археолоґ і помічників перекопали пляц при церкви. Тепер тырвают працы при ізоляциі, забезпечаню перед вільгітю церковных фундаментів та монтуваню дощовой і санітарной канализациі. Вшелеякы тяжкы і скомпликуваны земны працы при забытку сут ведены згідно з консерваторском штуком, включно з археолоґічным надзором. Завдякы проведеным працам з церкви зникне вільгіт, а вода буде одпроваджена поза терен огородженой церкви. Ремонт вяже ся з великыма коштами – по парох роках старань парохіі повело ся отримати середкы з Проґраму Охороны Забытків, але высокіст дофінансуваня не єст выстарчаюча, жебы покрыти вшыткы кошты ремоновых прац. В тій хвили вшыткы понесены кошты значні перекрочыли фінансовы можливости ждыньской парохіі, зато заміряных ремонтів не будут в силі зреализувати без помочы ззовни. Сперти парохію мож м.ін. через соспільну колекту на сайті zrzutka.pl пн. Prace remontowe przy cerkwi prawosławnej w Żdyni. Ждыньска парохія актуально чыслит лем 15 родин. Церков находит ся в історичній части села, в котрій родил ся і был хрещеный священномученик Максим Ґорлицкій.

”Вельокультуровіст. Дідовизна сучаной Европы”

В найблизшу середу 25. червця/юнія в Катовиях пройде загальнопольска конференция пн. ”Вельокультуровіст. Дідовизна сучаной Европы”. Подія пройде в Інституті ім. Войцєха Корфантого, в рамках обнятя Польщом президенциі в Европейскій Уніі в першій половині того рока. Цілю конференциі єст промоция та популяризация европейской культуровой і языковой ріжнорідности, як тіж европейской культурной дідовизны. Запрезентуваны будут рефераты академіцкых выкладовців, журналистів і представників світа культуры, якы накрислят тематичну обшыр, обнимаючу м.ін. культурну дідовизну нацийональных, етнічных, реліґійных меншын, культурну дідовизну погранича Серединно-Східньой і Полудньовой Европы, меджекультуровый діалоґ, вельокультуровіст. Участ в конференциі єст дармовa, днес остатній ден записів. Дрібниці найдете на сайті Інституту.

”Три ябка” в Театрі Александра Духновича в Пряшові 

Уж заран, в суботу 21. червця/юнія в Театрі Александра Духновича в Пряшові буде мож видіти пєсу пн. ”Три ябка”. Спектакль мал свою премєру в тым році в просторах ґорлицкой Руской Бурсы. Стоваришыня «Руска Бурса» в Ґорлицях в рамках свойой діяльности вырішыло збогатити лемківску драматурґію, і попросило о написаня пєсы Станіслава Білого, вызначного словацкого автора. Білый одкрыват універсальны вопросы, але деликатно іх прифарблює лемківскыма реалиями. Пєса была писана на конкретны три акторкы: в ролях выступуют Івона Іскра-Криницка, Наталия Малецка-Новак і Моніка Тылявска. Станіслав Білый “Три ябка” написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик. Вступне 7 евро. Обовязує скорша резервация – дрібниці найдете на сайті Театру.

Джерело фотоґрафіі: zrzutka.pl – Prace remontowe przy cerkwi prawosławnej w Żdyni