Сумар дня на 20. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 20. листопада/новембра 2025 р.

Грекокатоликы в Польщы приняли григоряньскій календар

Як вчера поінформувала грекокатолицка Церков в Польщы, владыкы той же церкви рішыли о полным переході на григорияньскій календар. Рішыня было приняте Синодом Єпископів перемышльско-варшавской митрополиі, якій засідал в Ольштыні 14. листопада/новембра. Рішыня владык з обшыри Польщы поблагословил предстоятель УГКЦ – владыка Святослав (Шевчук). Перехід на григорияньскій календар означат, што вшыткы свята, так нерухомы, як і рухомы, одтепер вірны грекокатолицкой церкви в Польщы будут святкувати за новым стильм, включно з Пасхом, Сошествійом Святого Духа та Великым Постом. В практиці означат тото, што Великден не буде уж святкуваный вєдно з вірныма православной Церкви, а в часі, коли святкуют римокатоликы. Перехід на григорияньскій календар буде од Неділі о Закхею, тє. од 18. січня/януара 2026 р. Скорше, бо од 1. вересня/септембра 2023 р. Украіньска Грекокатолицка Церков так на Украіні, як і Польщы перешла на тзв. новоюлияньскій календар, што в практиці означало, же Різдво было святкуване подля григорияньского рахуваня, а Великден за юлияньскым.

Уж заран «Лемкы в Центрі»

Уж заран зачынат ся цикль подій в Любіні – пн. «Лемкы в Центрі». О 18.00 год. в Ґалериі Cuprum Арена обуде ся показ моды з колекциі РУСИНКА Анны Мариі Зиґмунт та концерт ЛАПіТ «Ластівочка». 22 листопада/новембра о 11.00 год. буде мож зайти до православной церкви св. Тройці, де парох, о. Богдан Репела оповіст о істориі любіньской парохіі та загалом о православю. 24. листопада/новембра в Ґалериі CDT в Любіні буде вернісаж выставы творчости Епіфана Дровняка – Никыфора Креницкого. Першый раз в істориі Любіна буде запрезентувана творчіст того выдатного лемківского творці. Выстава буде доступна місяц – до 19. грудня/децембра.

І Медженародна Конференция Молодых Карпаторусиністів

26. листопада/новембра на Пряшівскым Університеті одбуде ся І Медженародна Конференция Молодых Карпаторусиністів – Русиністика в серци Европы. Подію орґанізує Інститут Русиньского Языка і Культуры. Головном темом конференциі є «Культурна памят і перспективы карпаторусиністикы». Цілю конференциі є створити простір для молодшой ґенерациі карпаторусиністів – докторантів, зачынаючых і науковых робітників і інчых, котры досліджают і роблят з языком, літературом, історийом, культуром, фольклором, медиями і дальшыма обшырями в рамках карпаторусиністикы. Цілю є представити наукову роботу, взаємно перепоіти молоду ґенерацию і вытворити плятформу на выміну досвідчынь. З конференциі буде пак публикуваный збірник Ruthenica Iuvenum. Охочы выступити з рефератом (15-20 мин.) і опубликувати статю в збірнику найпізнийше до заране – пятниці 21. листопада/новембра, можут посылати своі рефераты.

Засідало аступительство ПСК

В віторок 18. листопада/новембра одбыло ся засіданя Заступительства Пряшівского Самосправного Краю (ПСК). Крайскы посланці окрем інчого вырішыли, же в 2026 р. піде на схемы дотаций 2,4 мілийона евро. Інформувало о тым Одділіня Комунікациі ПСК. ПСК буде в слідуючым році господарити з розрахунком близко 553 мілийонів евро. В порівнаню з тым роком то є о 244 мілийоны евро веце. Дотациі будут приділювати ся в трьох етапах. Заінтересуваны будут годны подавати внескы од 1. січня/януара до 1. лютого/фебруара 2026 р. Найвеце грошы, аж 1,95 мілийона евро, розділят посланці селам, містам, безпрофітовым орґанізациям, громадяньскым здружыням, реґіструваным церквам, фізичным і юридичным особам. Мінімальна сума дотациі є 500 евро, максимальна 5 тисячів евро.