Сумар дня на 20. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 20. жолтня/октобра 2023 р.

XVI Стрічы Трьох Поколінь

Уж заран зачнут ся XVI Стрічы Трьох Поколінь – подія орґазнізувана Кружком Стоваришыня Лемків в Пшемкові. Стрічы будут проходити два дни – в суботу 21. і неділю 22. жолтня/октобра. Першый ден подія пройде в Пшемкові, а другій в Радваницях. На концертах запрезентуют ся ґаздове – ЛАПіТ «Ластівочка», його діточа ґрупа «Ластівчата» і запрошены гості. Дотля не знатя было хто окрем ґаздів появит ся на обох сценах. Тепер знаме, што запрезентуют ся м.ін. Секция Рапу, н’лем фольк, Барвінок зо Словациі і Файна Ферайна. В суботу подія одбуде ся в Пшемківскым Осередку Культуры, а о ден, в неділю, в Ґмінным Осередку Культуры в Радваницях. Початок о 16.00 год.

Карпаторусиньскій Семінар

В понедільок 23. жолтня/октобра з нагоды святкуваня Дня Русинів в ЗША пройде Карпаторусиньскій Семінар. Буде він мал онляйнову форму, пройде через плятформу ZOOM. Подію орґанізує Карпаторусиньскє Товариство. Семінар буде вюл проф. Павел Роберт Мачоґій. Звіданя, на котры одповіст, то м.ін.: як выглядало жытя нашых предків в ХІХ столітю і што на тото влияло, як реформы Габсбурґів змінили іх жытя, хто жыл вколо них і входил з нима в реляциі – Словакы, Мадяры, Німці, Жыды і інчы. Сесия з проф. Маґочійом буде інтерактивна – орґанізаторы рекомендуют прирыхтувати своі звіданя до дискусиі. Для тых, котры не можут взяти участи нажыво, вебінар буде награный.

В Празі одпрезентуют русиньскє выданя часопису Plav

В тот сам ден, в понедільок 23 жолтня/октобра в Празі пройде подія, в рамках котрой буде одпрезенуване выданя часопису Plav присвяченого русиньскій літературі. Plav – то чешскій часопис про світову літературу, якій выходит од 2005 рока. Чысло 8 з 2023 р. є присвячене русиньскій літературі, і часопис презентує досправды шыроку скалю літературы карпатскых Русинів. На мультіжанровым вечері на участных жде не лем чытаня русиньской літературы в чешскым перекладі, але так само музика ци авдийовізуальны проєкциі. Більше про русиньскє выданя часопису і його презентацию прочытате в дописі на нашым портали.

Проздравотна акция в Польковицях

В Польковицях рушыла уж XVII едиция здравотного проґраму бургомайстра Польковиц Лукаша Пузнєцкого пн. «Хороню жытя перед раком». Акция єст направлена на жены, кєд же як раз в тым місяци припадат Світовый Ден Свідомости Рака Груди. В єй рамках жытелькы ґміны мали можливіст м.ін. записати ся на дармовы профіляктичны баданя, котры будут ведены в Польковицкым Центрі Здравотных Услуг в тым і слідуючым місяци. З рока на рік заінтересуваня акцийом єст штораз більше. Акция заохочат жытелькы ґміны до профіляктичных бадань не лем в часі єй тырваня, але і цілый рік.

Лемковина Ультра Трейль

Припоминаме, што уж в тот вікенд 21. і 22. жолтня/октобра на Лемковину придут спортовці і аматоры з цілой Польщы і не лем, жебы взяти участ в тогорічній едициі Лемковина Ультра Трейль. Біговый фестіваль тішыт ся великом популярністю. До каждой едициі зголошує ся штораз то більше участників, а серед них росне і чысло Лемків. Спортовці і аматоры біганя можут выбрати єдну з 6 трас – долгости 150, 100, 70, 48, 30 або 10 км. Участникы ЛУТ будут стартувати з Крениці, Івонича, Гыровой, Рыманова і Команчы, а першы выстартуют уж о 1.00 год. в ночы в суботу з креницкого дептака. Мета і вручыня грамот, так як і в попередніх роках, пройде в Команчы. Партнетом подіі є Підкарпатскє Воєвідство.