Сумар дня на 20. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 20. жолтня/октобра 2025 р.

Вілямівскій не отримат статусу реґіонального языка

Вілямівскій не отримат статусу реґіонального языка. Президент Польщы Кароль Навроцкій одмовил підписаня уставы з 12. вересня/септембра тр. о новелизациі закону о нацийональных і етнічных меншынах та реґіональным языку і дакотрых інчых устав. Устава мала вызнати вілямівскій за реґіональный язык. Подля опубликуваного поясніня, президент мал вантпливости, ци реґуляция была оперта на мериторичных основах, а не была лем символичной або політичной натуры. Президент вказал на опініі дакотрых языкознавців. Окрем того звернул увагу, што введіня той уставы вязало бы ся з вымогом формальной едукациі вілямівского языка. Як подано в поясніню, Бюро Експертиз і Оціны Наслідств Реґуляциі сиґнализувало можливы трудности зо зрыхтуваньом властивой методикы вчыня, проґрамовой основы, проґрамів вчыня і науковых помочы. Полне поясніня вета мож чытати на офіцияльным сайті Президента Польской Республикы.

ОСРС выбрало новы власти. Русины мают свого амбасадора в ПСК

В пятницю 17. жолтня/октобра в Пряшові прошло 39. засіданя Округлого стола Русинів Словациі. Плятформа, в котрій сут здружены русиньскы орґанізациі, інституциі, але і незалежны активісты, оцінила роботы за попередній період, і выбрала новы власти. Ведучым ОСРС остал Мілян Ян Піліп. Єдным з гости засіданя был Ян Коцак, котрый 16. жолтня/октобра был выменуваный председом Пряшівского Самосправного Краю за русиньского амбасадора, што одповідат за кооперацию при підпорі і розвитку русиньской соспільности. Дрібниці чытайте на нашым портали.

Закрыты дорогы Чырна – Баниця і Крениця – Тылич

Днес рушыл послідній етап робіт на дорозі Чырна – Баниця. В його рамках буде положена остатня верства підбудовы і нижня верства асфальту. В звязку з тым дорога буде од днес цілковито закрыта і непереіздна. Роботы потырвают до пятниці 31. жолтня/октобра. Обізд до ґміны Устя Рускє буде можливый через Фльоринку і Брунары. Днес рушат тіж дальшый етап робіт на трасі Крениця – Тылич, в звязку з будовом дощовой сіти, санітарной канализациі і водопроводной сіти на ул. Пулаского в Креници. Дорога буде закрыта до середы 29. жолтня/октобра. Тоты, котры хотят переіхати з Крениці до Тылича, можут скорыстати з обізду через Поворозник або воєвідском і державном дорогом через Мохначку Выжню і Нижню.

Крениця Форум 2025

В послідній вікенд місяця, 28.-30. жолтня/октобра в Креници пройде чергова едиция Крениця Форум. Орґанізаторы заповідают серіозны бесіды о безпеці Польщы і Европы, модернізациі арміі, одпорности державы, але і о роли самоурядів, наукы і громадян в будуваню будучности державы. На сцені вкажут ся політикы, експерты, публицисты і самоурядовці. Участ заповіли м.ін. Президент Польщы Кароль Навроцкій, його попередник Анджей Дуда, як і Президент Словациі Петер Пеллеґріні. Серед панелистів мают ся найти представникы ріжных середовиск. Орґанізаторы хотят підкрислити соспільный характер подіі, зато зрыхтували безплатны білеты для адміністрациі, служб, позаурядовых орґанізаций і студентів. Чысло дармовых місц єст ограничене, реґістрация на інтернетовым сайті Крениця Форум 2025 єст уж одкрыта. Поза проґрамовом частю присутны будут мочы взяти участ в авторскых стрічах, стратеґічній воєнній грі, бізнесовых панелях, як і культурных подіях. Головным Партнером Крениця Форум єст Малопольскє Воєвідсто.