Сумар дня на 21. липця/юлия 2025 р.

Приносиме вам сумар медияльной ґрупы ЛЕМ.фм+ на ден 21. липця/юлия 2025 р.

Проблемы з реактивацийом лыжной стациі в Щавнику

Не знатя, ци поведут ся пляны реактивациі лыжной стациі в Щавнику в ґміні Мушына. Бургомайстер Ян Ґольба поінформувал, што Реґіональна Дирекция Охороны Середовиска выдала неґативне рішыня в справі рапорту влияня на середовиско. Блокує тото пляны Польскых Кабельных Желізниц (PKL), котры замірюют зас одкрыти в тым місци лыжный осередок по долгых роках перервы. Як подал бургомайстер Мушыны Ян Ґольба, справа рапорту рішала ся од рока. Подля бургомайстра, по неґативній опініі реґіональной дирекциі неє шанс, же лыжы вернут до Шавника в найблизшым зимовым сезоні. Як подал, не знат оправданя неґативного рішыня. Подля бургомайстра спілка PKL одкличе ся тепер од неґативного рішыня до Ґенеральной Дирекциі Охороны Середовиска. Інвестор выдал уж парудесят мілийонів злотых на єден з плянуваных вытягів – ґондольово-креселковый. Другій вытяг, канаповый, єст уж на пляци будовы і жде на інсталяцию. Як подал бургомайстер Ґольба, кєд Ґенеральна Дирекция Охороны Середовиска выдаст опінію згідну з реґіональном дирекцийом, буде то значыло, што лыжна стация в Щавнику не буде одкрыта. Кошт будовы реченой стациі то понад 100 млн злотых.

Карпатскій реґіон: етнолінґвістика і культуровы студиі – другій набір 

Ягайлоньскій Університет поінформувал о напрямах студий, на котрых не выпонил ся ліміт місц в першій рекрутациі. Учельня не підняла рішынязаперти речены напрямы, але урухомит додатковый, другій набір – записы завершат ся в вересни/септембрі. В другым наборі буде ведена рекрутация м.ін. на унікальный в скали цілой Польщы напрям студий – Карпатскій реґіон: етнолінґвістика і культуровы студиі. «То выняткова нагода, жебы зглубити таємниці Карпат і іх богаты культуры» – чытаме в інформациі. Студенты будут здобывати знаня з такых обшыри як: культурова антрополоґія, реліґійознавство ци етнолінґвістика. Обовязковы будут тіж занятя з языків реґіону: украіньского, румуньского, словацкого, буде мож тіж познати основы третього – до выбору: румуньского або лемківского. В проґрамі занять сут тіж тереновы практикы і баданя.

Хіротонія нового єпископа вроцлавско-кошаліньской єпархіі

Грекокатолицка вроцлавско-кошаліньска єпархія поінформувала о даті хіротоніі о. Мариюша Дмитерка. Як інформувал 10. липця/юлия Ватикан папа Лев ХІV благословил рішыня Синоду Єписопів Украіньской Грекокатолицкой Церкви і на помічного єпископа Вроцлавско-Кошаліньской єпархіі призначыл о. Мариюша Тому Дмитерка. Єпископска хіротонія нового помічного єпископа одбуде ся 13. вересня/септембра в катедральным соборі Воздвижыня чесного і животворящого Креста во Вроцлаві.

XXXI Стрічы з лемківском культуром

О місяц в Ґожові Великопольскым одбуде ся чергова едиция «Стріч з лемківском культуром». На подію просит Кружок Стоваришыня Лемків в Ґожові Великопольскым. Подія пройде в рамках циклю культурных імпрез «Добрый вечер Ґожів». XXXI Стрічы з лемківском культуром пройдут на ґожівскым катедральным пляци в суботу 16. серпня/авґуста о 19.00 год. В концерті выступлят Лемківскій Ансамбль Пісні і Танця «Ластівочка», Coolbaba та Rene Bolesa & Band зо Словациі. Вступне дармо.