Сумар дня на 21. січня/януара 2026 р.

Приносиме вам сумар медияльной ґрупы ЛЕМ.фм+ на ден 21. січня/януара 2026 р.

Заколядуют Сестры Бочнєвич

Уж в найблизшу суботу 24. січня/януара в Ґмінным Центрі Культуры з Нєґославицях (Niegosławicach) з сідибом в Ґосцєшовицях (Gościeszowicach) одбуде ся Новорічный Концерт, а выступлят Сестры Бочнєвич разом з родичами. Запрезентуют лемківскы коляды і традицийну музику при акомпаніяменті двоіх гушель і ґітары. Сестры Бочнєвич то артисткы, якы знаны сут в лемківскым середовиску. Музичну дорогу зачынали в родинным ансамблі Окмель. Реализували чысленны музичны проєкты. Протягом років выступували м.ін. в Ластівочці, Кычері, Лемко Тавер, Камеральній Оркєстрі „Concertino”. На совім конті мают м.ін. платню Лемківскы Варияциі – є то твір клясичной музикы на основах народной лемківской музикы, выконуваный через оркєсту і хір вєдно з солистками і солистами. Од 2018 рока спілтворят ансамбль Секция Рапу. Концерт зачне ся о 17.00 годині.

Актуализация нічліговой базы Ґміны Устя Рускє

Ґміна Устя Рускє звертат ся з апельом до вшыткых властителів обєктів, в котрых мож наняти спаня – як раз тырват актуализация ґмінной нічліговой базы. Мож зголосити наново або зактуализувати даны, котры тыкают наниманя покоів, хыжок на літо ци аґротуристик. Мож пересылати інформациі, што односят ся до зміны чысла можливых нічлігів, сезоновости, телефону до контакту ци адресу вебсторінкы або інчых додатковых інформаций. Термін зголошыня новых даных або актуализациі дотеперішніх то конец місяця. З інформациями треба зголосити ся до уряду ґміны Устя Рускє з одповіднім внеском – єст він доступный в сідибі уряду.

Кривулька з Команчы на державным списку Украіны

Міністерство Культуры і Стратеґічных Комунікаций Украіны в остатніх днях додало три новы елементы до Державного Списку Нематерияльной Культурной Спадковины Украіны. Єден то буковиньска традиция з Буковины, два то лемківскы елементы культуры. З Буковины была вписана традиция звязана з культуром і зо звыками, котры повязаны з великоднім обядовым хлібом, а дві лемківскы традициі, якы нашли ся на списку, то жіноча прикраска кривулька та традицийна поливка – кєселиця. Тым самым кривулька з Команчы находит ся уж на двох Державных Списках Нематерияльной Культурной Спадковины – то є Польщы і Украіны.

Помагал інчым – тепер поможме мы!

Фурт тырват соспільна колекта на поміч для Богдана Малешы – музика, соспільного діяча, чловека культуры – наштоден робітника Ґмінного Осередка Культуры Ґміны Ґорлиці. Богдан Малеша од років активні діє в реґіоні, заанґажуваный в культурны подіі ґорлицкого повіту, в тым вельо лемківскых. Знаный як жычливый, помічный і добрый чловек – тепер сам потрібує підпертя. Хвилю тому перешол поважну операцию, котра была єдином можливістю на затриманя хвороты – раковины. Операция ся поевла, але збераны сут середкы на коштовну регабілітацию, дохторскы консультациі і баданя. На тот момент з закладаных 50 тис. злотых зобраных єст 42 тис. Колекта зберана єст через сайт pomagam.pl – назва колекты то “Pomoc dla Bogdana Maleszy”.