Сумар дня на 21. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 21. жолтня/октобра 2024 р.

Одбыло ся Общелемківскє Поломництво до Талергофу

В минулый вікенд, 18.-19. жолтня/октобра, одбыло ся Общелемківскє Поломництво до Талергофу, орґанізуване Талергофскым Комітетом в рамках Лемківскых Упамятнінь 110. річниці інтернуваня Русинів в лаґрі в Талергофі (1914-1917). Суботній проґрам зачал ся грекокатолицком Божеском Літургійом в костелі в Фельдкірхен бай Ґрац. Пак одбыл ся короткій культрный проґрам. Вызвучали патріотичны пісні, в тым наш гымн «На Лемковині». Одчытаны были фраґменты з «Дневника Лемка з Талергофу» Талергофця Теофіля Куриллы. Пак поломникы пішли на недалекій цмонтір, де перепохованы сут мощы Талергофців. На місци была одслужена православна панахіда. Присутны были делеґациі Стоваришыня Лемків, Руской Бурсы в Ґорлицях, Телерговского Комітету, редакторы радия і порталю лем.фм. В упамятнінях взяли тіж участ бургомайстер Фельдкірхен бай Ґрац і дальшы поломникы. Перше общелемківскє поломництво до Талергофу одбыло ся в 2004 р., орґанізатором было Стоваришыня Лемків. Товды одслужена была православна панахіда, а тіж одкрыто пропамятну таблицю в ротунді на місцевым цмонтери. Того рока будут іщы дальшы Талергофскы Упамятніня, о котрых будеме іщы інформувати.

На засіданю СКУтНіЕМ будут дискутувати о слідстві ІНП в справі акциі ”Вісла”

В четвер 24. жолтня/октобра одбуде ся 85. пленарне засіданя Спільной Комісиі Уряду та Нацийональных і Етнічных Меншын. Єдным з пунктів проґраму засіданя буде “Інформация на тему слідства веденого в справі рішыня о выселіню в 1947 р. в рамках акциі ”Вісла” жытелів полудньово-східньой Польщы”. Выступлят представникы Інституту Нацийональной Памяти (IНП) і Омбудсмана, а пак одбуде ся дискусия. Припомнийме, што в листопаді/новембрі минулого рока ІНП поінформувал, же слідство в справі рішыня о проведіню Акциі «Вісла» было піддане ремісиі, значыт прокуратор Комісиі Гоніня Злочынів проти Польскому Народови в Ряшові не виділ основ потвердити, же выселіня Лемків і Украінців было злочыном проти людства ани комуністичным злочыном. В поясніню подано шор інформаций, якы не сут згідны з історичном правдом і передают фальшывый образ выселіня. Справа выкликала шырокы протесты. Стоваришыня «Руска Бурса» в Ґорлицях та Стоваришыня Лемків зложыли осіню минулого рока офіцийне зажаліня до Округового Суду в Варшаві, в котрым в цілости заскаржыли постановліня выгашыня досліджыня ІНП в справі акциі «Вісла». Округовый Суд в Варшаві постановом з дня 17. липця/юлия тр. розсмотріл зажаліня обох выміненых орґанізаций та зажаліня інчых орґанізаций і осіб. Рішыл скасувати заскаржену постанову і передати справу до ІНП до дальшого ведіня. Суд ствердил, што представлена прокуратором ІНП арґументация є неправильна і необхідна є комплексова оціна фактичного стану справы, в тым схоснуваня знаня авторів науковых робіт на тему акциі «Вісла» – осіб о найвекшым науковым доробку в тій обшыри, і аж товды підняти рішыня в справі.

XVII Стрічы Трьох Поколінь з Лемківском Культуром

В найблизшый вікенд 26.-27. жолтня/октобра на Нижнім Шлеску одбудут ся XVII Стрічы Трьох Поколінь з Лемківском Культуром. Орґанізатором єст Стоваришыня Лемків. В рамках подіі одбудут ся два концерты, першый в суботу о 16.00 год. в Пшемківскым Осередку Культуры і другій в неділю о 16.00 год. в Авли Комплексу Шкіл в Польковицях. В концертах выступит Лемківскій Ансамбль Пісні і Танця «Ластівочка» разом з запрошеныма гістми.