Сумар дня на 21. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 21. жолтня/октобра 2025 р.

Новый міст на повітовій дорозі з Санковой до Розділя буде готовый до кінця листопада

Добры новины дла подорожуючых, новый міст на повітовій дорозі з Санковой до Розділя буде готовый до кінця листопада/новембра. Деревяна конструкция была розобрана пару місяців тому, што причынене было технічным станом деревяного мосту. Дальше хоснуваня конструкциі вязало ся з ризиком, зато рішено о будові нового мосту. Звернено тіж увагу на збільшеный рух в страну курорту Вапенне, котрый в остатніх роках зыскує на популярности, а то вказало на конечніст будовы нового переізду. Роботы обнимали розобраня попереднього мосту, будову новой конструкциі з одводніньом, освітліньом і ознакуваньом. Додатково в рамках інвестициі рішено упорядкувати терен докола мосту. Цілковитый кошт інвестициі то понад 3 млн зл, з чого половина походит з середків в рамках загальной резервы субвенциі буджету державы на 2025 рік.

«Спільні для памяти» акция прятаня цмонтеря в Старым Лупкові

Ґміна Команча просит до участи в шторічній акциі прятаня цмонтеря в Старым Лупкові. Подія під гослом «Спільні для памяти» пройде 25. жолтня/октобра і зачне ся о 10.00 год. До участи прошены сут не лем жытелі ґміны, але вшыткы заінтересуваны, котрым близка єст істория Старого Лупкова. Участникы, кєд лем мают таку нагоду, прошены сут о забраня зо собом граблі, рукавиц ци мішків. Окрем спільного порядкуваня цмонтеря з І світовой войны, пройде і поставліня памяткового креста. Для вшыткых участників орґанізаторы прирыхтуют горячый напиток і почастунок.

«Може ся не верну» выставу Давида Здобыляка

В Ґалериі Штукы в Малопольскым Центрі Культуры Сокіл в Новым Санчы обзерати мож выставу малярства Давида Здобыляка пн. «Може ся не верну». Презентуваный єст на ній найновшый цикль образів артисты, навязуючый до його лемківскых коренів і дідовизны та траґічной долі лемківского народу. Давид Здобыляк то артиста польско-лемківского походжыня. Вродил ся в 1993 році в Хобєні на Нижнім Шлеску. Єст абсольвентом Академіі Красных Штук в Кракові. В Новым Санчы мож обзерати образы до 2. листопада/новембра тр. Рефлексиі до выставы «Може ся не верну» Давида Здобыляка можете уж чытати на нашым портали.

25 років істнуваня Ансамблю Відимо

Припоминаме, што ансамбль Відимо святкує того рока ювілей – 25 років істнуваня. З той нагоды 25. жолтня/октобра в Саноку пройде вынятковый концерт. В проґрамі подіі находит ся головный концерт ансамблю Відимо, презентация запрошеных гостів та показ архівальных знимок і несподіванкы. Ансамбль хоче, жебы каждый, хто лем має дяку, взял участ в подіі, без конечности закупу білету. З той причыны рішыл одкрыти колекту на сайті zrzutka.pl, де мож сперти ініциятиву. Зобраны середкы перезначены будут на професийну оправу концерту, документацию та вынагороджыня запрошеных артистів. Мотузок до колекты найдете в днешнім сумарі або вписуючы на сайті zrzutka.pl госло «25 lat Widymo – świętujmy razem».