Сумар дня на 22. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 22. серпня/авґуста 2025 р.

«Села праві забыты – Лемківска істория околиц Яслиск»

Фундация Ґу Горам просит жытелів і туристів до участи в подіі пн. «Села праві забыты – Лемківска істория околиц Яслиск». Одбуде ся она о два тыжні – в суботу 6. вересня/септембра в Яслисках. В проґрамі стрічы находит ся краєзнавча прогулька, яка піде з Яслиск, через Суровицю, Поляны Суровичны і Волю Нижню. Орґанізаторы запевняют переізд бусом на місце старту і поворот та почастунок. Дальше, в сали Ґмінного Осередка Культуры одбуде ся презентация історично-краєзнавчых таблиц і прелекциі посвячены діям і краєвидови околиц Яслиск. Вечер завершыт выстава архівальных і сучасных фотоґрафій та спільне співаня, котре поведут Юлия Дошна і Мирослав Боґонь. Партнерами проєкту сут Ґмінный Осередок Культуры і Чытальництва в Яслисках, Фундация Рейвах і Братство Грекокатолицкой Молодежы «Сарепта». Подія єст дофінансувана з середків Міністерства Культуры і Нацийональной Спадковины в рамках проґраму Нацийонального Центра Культуры: Культура – Інтервенциі. Орґанізаторы підкрисляют, што подія має на ціли припомніня істориі лемківскых сел і інтеґрацию локальной соспільности і гости.

Паркова Гора в Креници пройде ревітализацию

Як інформувал в тым тыжни бургомайстер Крениці Пьотр Рыба, Паркова Гора в Креници пройде ревітализацию. Завдякы середкам з Европейскых Фондів для Малопольщы 2021-2027 (Европейскій Фонд Реґіонального Розвитку) поведе ся зреализувати інвестицию варту близко 11 млн 300 тис. злотых, з чого понад 9,5 млн злотых то зовнішні середкы. На Парковій Горі появит ся м.ін. нове покрытя стежок, 140 новых лямп, кошы і насаджыня, одновлена альтана та медже Загородами Сил Натуры і Сонечным Джерелом – выняткова Пчоляча Закутина. Уж в будучым місяци буде оголошеный конкурс оферт на выконавцю той інвестициі.

Выдолжeный набір до Рады Діалоґу з Молодым Поколіньом

Комітет до Справ Публичного Хосну подал, што з огляду на вакацийный період і чысленны голосы од кандидатів, позаурядовых орґанізаций та ґмінных, повітовых і воєвідскых молодіжных рад, Ведуча Комітету дс. Публичного Хосну Міністра Адрияна Поровска выдолжат набір зголошынь до Рады Діалоґу з Молодым Поколіньом ІV каденциі до 15. вересня/септембра тр. Решта условій набору не єст змінена і находит ся в опубликуваным в червци/юнію оголошыню в інтернетовым сервісі Польской Республикы. Там тіж мож найти взоры формулярів зголошынь і одповіди на найчастійше даваны звіданя.

Грекокатолицкє нічне поломництво на Святу Гору Явір

Уж днес вечером выйде грекокатолицкє нічне поломництво на Святу Гору Явір. Поломникы вырушат о 18.00 год., підут через Пітрову і Фричку на Пряшівскій Руси, жебы перейти до Ізб і Біличной на Лемковині. Одтамале, заран рано, выйдут на Святу Гору Явір. Там, в каплици Покровы Пресвятой Богородиці буде правлена Служба Божа о год. 6:30.