Сумар дня на 23. червця/юнія 2022 р.

Приносиме вам сумар медияльной ґрупы ЛЕМ.фм+ на ден 22. червця/юнія 2022 р.

В Замєницях посвятили таблицю. Вызвучало «Глян Боже оком на Лемковину»

Як сме уж інформували, в понедільок, 20. червця/юнія, в Заменицях (в ґміні Хойнів) прошло торжественне одкрытя пропамятной таблиці посвяченой Лемкам, котры в наслідстві акциі «Вісла» мусіли оселити ся на обшыри ґміны Хойнів. Орґанізаторами подіі были війт ґміны Хойнів Анджей Пыж та грекокатолицка парохія Рождества св. Йоана Хрестителя в Заменицях. Подія проходила в памят 75. річниці выселінь Лемків з іх рідной землі. В заменицкым грекокатолицкым храмі, якій приналежыт до вроцлавско-кошаліньской єпархіі Украіньской Грекокатолицкой Церкви в Польщы, вызвучала пісня «Глян Боже оком на Лемковину». По богослужыню, принагідных перемовах і одкрытю таблиці в проґрамі дальшой части подіі была прелекция Юрия Стариньского о Лемках в контексті предків, родины, сусідів і знаємых та поетицко-музична част. В подіі брал участ м.ін. ведучый Стоваришыня Лемків, Андрий Копча. Присутны были так грекокатоликы, як і православны Лемкы.

Молопольскы Вінкы 2022

В минулу неділю, 19. червця/юнія, одбыли ся Малопольскы Вінкы 2022. То уж V едиция стрічы, яка посвячена єст традициі собіток. Подію заініциювал Молодіжный Фольклорый Ансамбль «Рутич» діючый при Ґмінным Осередку Культуры в Ґорлицях. Як што рока подія прошла в Скансені Погіряньского Села в Шымбарку. Участ в подіі взяли не лем члены Рутича, але тіж члены ансамблів Поляне і Бескіды, котры запрезентували ся з танцями і піснями. Не бракло тіж лемківскых акцентів, бо серед артистичных ґруп нашли ся представникы ансамблю Терочка, діючого при Стоваришыню «Руска Бурса» в Ґорлицях. Терочковы дівчата разом з ведучым ансамблю вели варштаты гуляня, на котрых вчыли охочых танця. Друга част подіі зачала ся од єдной з найбарже знаных традиций звязаных з Ночом Купалы – од гляданя квітя папортины. Найважнійшым пунктом подіі было пущаня вінків на воді.

Музей в Меджелабірцях отверат свій літній сезон

Музей Модерного Кумшту Енді Варголя в Меджелабірцях отверат тогорічный літній сезон вельома вернісажами. В рамках тых подій премєрово представляны сут вызначны творы андерґрандовой культуры 60. років ХХ ст. на Словациі. Єдном з выстав є портфоліо The Valley. Творит го 16 ілюстраций Кіта Герінґа і 16 текстів писателя Вілияма Барроуза. Музей в рамках подіі інавґурувал тіж портрет Йозефа Бойса, приятеля Енді Варголя. Третім представленым унікатом є проєкт Жывот за єден цент. В музею тепер видіти мож і саму книжку з так званой едициі Париж з едичным чыслом 29/100.

Одкрыли ренесансовый каштель в Гуменным

В віторок, 21. червця/юнія, святочно одкрыли ренесансовый каштель в Гуменным, котрый має по великій реконструкциі екстерєру зас подобу з періоду посліднього перебудуваня родом Андрашійовых. Проєкт комплексового ремонту словацкой нацийональной культурной памяткы основаный на реставраторскых принципах з цілковитым коштом приблизно 6,5 мілийона евро реализувал ся в парох етапах і проходил разом 15 років. Результаты робіт Выгорлятскій Музей, котрый в каштелю має свою працовню, і Пряшівскій Самосправный Край як зряджуватель музею і головный інвестор представили в віторок за участи пряшівского жупана Міляна Маєрского.