Сумар дня на 23. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 23. лютого/фебруара 2026 р.

Mинуло 15 років од смерти Юрия Новосільского

В минулу суботу 21. лютого/фебруара минуло точно 15 років од смерти Юрия Новосільского. В тот ден на Раковицкым Цмонтери в Кракові правлена была панахіда при гробі артисты, яку одслужыл о. Ярослав Антосюк при присутности близкых, приятелів, артистів і вшыткых, котрым близка была творчіст і діяльніст Новосільского. Свічку засвітила тіж делеґация Стоваришыня «Руска Бурса» в Ґорлицях.

Якуб Пшыбыцєнь остал асистентом музичного директора Бостоньской Симфонічной Оркєстры

Радо інформуєме, што Бостоньска Симфонічна Оркєстра, што належыт медже Велику Пятку оркєстр Зъєднаных Штатів Америкы, оголосила, хто заступит дотеперішніх асистенів музичного директора Андріса Нел’сонса. Будут то Кытайка Ііран Джао та Якуб Пшыбыцєнь – Лемко з Зеленой Горы, узнаный уж дириґент i гушляр молодого поколіня, наштоден жытель швейцарского Цуріху. В своім доробку має м.ін. спілпрацу з єдном з найліпшых оркєстр на світі – Лондоньском Симфонічном Оркєстром, полнил тіж функцию асистента маестра Людовіка Морльо при Симфонічній Оркєстрі Барцельоны і Нацийональній Оркєстрі Катальоніі. Дириґувал тіж лемківском опером «Голос». Ґратулюєме!

Конкурс на становиско директора Інституту Языковой Ріжнорідности Польской Республикы

Міністер Культуры і Нацийональной Спадковины оголосил конкурс на становиско директора/директоркы Інституту Языковой Ріжнорідности Польской Республикы. Термін зложыня документів минят 23 марця тр. Дрібниці мож найти на інтернетовым сайті Інституту.

Выклад на тему Акциі «Вісла» і єй наслідств для лемківской соспільности в Державным Етноґрафічным Музею в Варшаві

Припоминаме о послідніх подіях, якы пройдут в тым місяци в Державным Етноґрафічным Музею в Варшаві, в рамках выставы «Формы присутности. Штука Лемків/Карпатскых Русинів». Уж заран, в віторок 24. лютого/фебруара в музею буде мож выслухати выклад на тему Акциі «Вісла» і єй наслідств для лемківской соспільности. Выклад выголосит проф. др габ. Ґжеґож Мотыка – директор Войскового Історичного Бюра, працівник Інституту Політичных Студий Польской Академіі Наук. Жебы выслухати выклад, треба одобрати безплатный білет на подію – на музейным вебсайті або в касах. Чысло місц ограничене. В остатній ден місяця, в суботу 28. лютого/фебруара буде чергове опроваджаня пн. «Іконы Лемковины», якє поведе Аґнєшка Клещ. Дрібниці о вшыткых подіях находят ся на інтернетовым сайті Етноґрафічнного Музею в Варшаві.

Марцьовы подіі товаришучы выставі «Формы присутности. Штука Лемків/Карпатскых Русинів»

Окрем того Державный Етноґрафічный Музей в Варшаві поінформувал уж о подіях рыхтуваных на будучый місяц. В неділю 1. марця пройдут фамелийны керамічны варштаты, на котрых творці заінспіруют ся гірскыма краєвидами. В неділю 8. марця одбуде ся кураторскє опроваджаня з темом «Хыжа як простір памяти». Поведе го куратор выставы др Михал Шымко. В тот сам ден будут тіж проходити фамелийны варшататы з циклю «На лемківскым пути». Тым разом участникы зрыхтуют гірскы краєвиды техніком коляжу. В суботу 14. марця одбуде ся дальше тематичне опроваджаня по выставі з темом «Портрет Лемкыні», якє поведе Аґнєшка Клещ. В тот сам ден пройде тіж стріча з Доротом Нєзнальском, котрой інсталяция єст презентувана на експозициі. Подіі товаришучы выставі «Формы присутности. Штука Лемків/Карпатскых Русинів» тішат ся так великым заінтересуваньом, што чысло доступных місц на конкретны акциі барз скоро ся вычерпувало. Продаж білетів на будучы подіі буде рушала тыжден перед плянуваном акцийом.