Сумар дня на 23. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 23. жолтня/октобра 2024 р.

85. річниця народин Івана Дзядика – на многы і благы літа!

Вчера, 22. жолтня/октобра, свою 85. річницю дня народин святкувал Іван Дзядик – плідный діяч Стоваришыня Лемків, писменник, участник культурного жытя Лемків в Польщы. Іван Дзядик пришол на світ во Фльоринці, вчас выгнаня трафил з родином до Михалова на Нижнім Шлеску. Як публициста задебютувал на девятнадцет років. Активно спілдіял при орґанізуваню перше Огниск, а пак Лемківской Ватры в Михалові. Был членом Театру Стоваришыня Лемків, мож го было видіти на сцені і попри сцені вчас Лемківскых Ватр на Чужыні, першых Медженародных Бієнале Лемківской/Русиньской Культуры в Креници, зындранівского Од Русаль до Яна. На вшыткых тых подіях Іван Дзядик радо выступувал в роли конферансиєра, гумористы. Был участником Світовых Конґресів Русинів як член делеґациі Стоваришыня Лемків. Через рокы публикувал на «Лемківскій Сторінці» ґазеты «Наше Слово», в союзівскых выданях: «Карпатской Руси», Календарях – альманах, часописі Стоваришыня Лемків «Бесіда» ци «Загороді». Тексты вказували ся тіж в «Православным Перегляді» і украіньскоязычных ґазетах «Нове жытя» на Словациі і «Ватра». Іван Дзядик єст тіж спілавтором двох збірок «Жартів і оповідань», а в 2006 р. опубликувал книжку під наголовком «Свята Земля». На многы і благы літа для пана Дзядика!

Поміч для вояків з Закарпатской Области

Общество Приятелів Підкарпатской Руси звернуло ся на своім офіцияльным сайті до членів і вшыткых прихыльників і підтримувателів з просьбом о поміч. Кінцьом жолтня/октобра разом з орґанізацийом Приятелі Підкарпатской Руси з Бырна хотят завезти гуманітарну поміч на Підкарпатя. Общество просит о фінансову підтримку. В рамках гуманітарной помочы хотят тоты дві орґанізациі привезти на Підкарпатя на Украіну м.ін. гемостатичны оклады для войсковых одділів, в котрых служат воякы в Підкарпатя. Орґанізация подала номер свого банкового рахунку, на котрый мож присылати грошы. Общество Приятелів Підкарпатской Руси было основане в 1990 році і діє в Чешскій Республиці. Є членьском орґанізаційом Світового Конґресу Русинів, його цілю є поглубляти односины з жытелями і орґанізациями Закарпатской Области Украіны, бывшой Підкарпатской Руси, підпора Русинів на териториі Чешской Републикы ци популаризация Русинів в Чешскій Републиці.

Лемкы на ЛУТ – не завели

В минулый вікенд проходили змаганя в літаню по горах – Лемковина Ультра Трейль. Участ в них взяла і чысленна делеґация лемківскых бігачів. На дистансі 30 км трасу закінчыли м.ін.: Александра Лепак, Наталия Кєц, Марґарета Кєц, Петро Ґалик, Данило Стариньскій, Матвій Бубернак ци Юрий Чупик. Дистанс 48 км закінчыл Роман Цюрик. Два найдолшы дистансы зробили: Адриян Горощак, якій перелетіл аж 100 км, та Кристиян Трохановскій, якій выбрал найдолшу можливу трасу з пропонуваных – зо стартом на західній Лемковині – в Креници і метом аж в Команчы – значыт дистанс 150 км верхами і убочами цілой Лемковины. Старт того дистансу был о пілночы, і треба было летіти цілу ніч, пак цілый ден, а часом іщы і наступну ніч. Од минулого рока мож тіж прібувати своіх сил на дистансі 10 км і тот закінчыла Мария Терефенко. Вшыткым бігачам ґратулюєме.

Петиция в справі опротестуваня будовы видоковой вежы на Маґурі

В звязку з медияльныма донесінями о пляні побудуваня на Маластівскій Маґурі черговой в терені видоковой вежы, на сайті petycjeonline.com явил ся проєкт петициі до війт ґміны Санкова Малґожаты Малух, в котрій сиґнатариі протиставляют ся тій думці. Aвторы листу, што сут любителями і постійныма бывальцями Низкого Бескіду, звертают увагу на унікальный характер того реґіону, знаного з дикой природы, тишы і спокою, а тіж богатой істориі. Подля них будова чероговй вежы спричынит непотрібну вытинку дерев, будову інфраструктуры, причынит ся до нищыня середовиска і історичных памяток. Авторы листу постулюют, жебы в місце вежы выремонтувати туристичну колибу на Маґурі, яка од років єст заперта. Петиция зобрала уж понад 180 підписів.