Сумар дня на 24. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 24. лютого/фебруара 2026 р.

Cоцияльны сiти не для наймолодшых

23. лютого/фебруара соймик воєвідства Малопольщы принял апель до уряду i парляменту, завдякы чому мат быти введеный заказ доступу до социяльных сiти для дiти i молодежы, котры не мают 15 рокiв. За принятьом апелю голосувало 34 радных, нихто не был проти, єдна особа ся стримала. Iнiциятива мат на цiли охорону наймолодшых, а предовшыткым iх психiчне здоровля. Як вказуют баданя, социяльны сiти мают неґативне влияня на молодых, в тым нп. на збільшаня ся депресиi ци проблемiв зо сном, а тiж розвивают явиска такы як цибернасильство.

Подорож Йоны Максима до Зъєднаных Штатiв

В днях од 23. лютого/фебруара аж до 10. марця 2026 р. Высокопреосвященый Йона Максим, пряшівскій архієпископ і митрополита, голова грекокатолицкой Церкви на Словациі, проведе пастырьско-робочу вiзиту в Зъєднаных Штатах Америкы. Цілю той подорожы є м.iн. зміцнити духовы звязкы зо словацкыма i русиньскыма вірныма в діаспорі, а тiж поглубити спiлпрацу з містныма єпископами. Подля плянiв Йона Максим мат гостити в парох штатах, котрых члены належат до русиньской Пітсбуржской Митрополитной Церкви.

Пташача ґрипа в Малопольщы 

В послiднiх днях Воєвідскій Iнспекторат Ветеринариi для Малопольщы потвердил, што в дальшым рейонi одкрыты были припадкы пташачой ґрипы. Іде о мертвы хворы лебеді з села Ваксмунд на Подгали. На початку мiсяця тоту хвороту медже дикыма птахами нотували в Краковi. З той причыны, што проблем поступує, влада воєвідства рiшыла ввести рестрикциi в аж 11 ґмiнах в трьох повiтах – новоторжскым, татряньскым i лимановскым. Тоты iнформациi непокоят вшыткых, але предовшыткым тых, якы тримают куры i можут однести великы траты. Треба єднак памятати, што пташачу ґрипу можут розносити дикы птахы, прото скоро може ся появити i в iнчых локализациях. Зато треба ограничыти контакт з тыма звiрятами, а припадкы мертвых ци хворых особникiв зголошати.

«Михал Чабала – Знаный незнаный» – выстава в Пряшовi

19. лютого/фебруара в Словацкым Нацийональным Музею – Музею Русиньской Культуры в Пряшові одбыл ся вернicаж выставы «Михал Чабала – Знаный незнаный». Чабала, выдатный маляр, якому посвячена є тота выстава, вродил ся в селi Чабины на Словациi i в тым роцi скiнчыл бы 85 рокiв. Малювал од наймолодшых рокiв, добыл тiж высшу освiту в тым напрямi, а його творы презентувны были на веце як 60 выставах. Вернiсаж доповідю на тему Чабалового жытя i творчости отворила кураторка выставы – Анна Симкова. Серед десяткiв презентуваных прац найдеме м.iн. краєвиды i портреты. Выставу буде мож видiти до 17. мая 2026 р.

115 рокiв Етноґрафiчного Музею в Краковi

В 2026 р. кракiвскiй Етноґрафiчный Музей святкує 115. ювiлей iстнуваня. З той нагоды Музей рыхтує два циклi подiй – «15 на 115» i «Весельме ся!», котры будут ся одбывати через близко цiлый рiк, од лютого/фебруара аж до 19. листопада/новембра. В рамках тых циклiв плянуваны сут выставы, тематичны прогулькы, лекциi, конференициi i вельо iнчых активности. Неповторном нагодом мат быти выстава, на котрiй будут презентуваны дакотры експонаты з першой выставы музею сперед 100 рокiв, а тiж такы, котры николи перше ся на ниякiй выставi не появили. Окремым проєктом сут варштатовы дiяня пiд гослом навязуючым до назвиска основателя музею Северияна Удзєлi – «То ся удiлят». На тоту част орґанiзаторы просят дорослых i молодіж, што скiнчыла 16 рокiв. Вшыткы подii, окрем варштатiв, подля доступных iнформаций, сут безплатны. Дрібниці i гармоноґрам ювiлею на перше пiл рока найдете на сторонi Музею.

Фотоґрафiя: pixabay.com