Сумар дня на 24. марця 2026 р.

Приносиме вам сумар медияльной ґрупы ЛЕМ.фм+ на ден 24. марця 2026 р.

Iнтронізация Преосвященного владыкы Мiляна Лаха

В суботу 21. марця в Грекокатолицкым Катедральным Соборi Воздвижыня Честного і Жывотворящого Креста в Братиславі одбыла ся інтронізация другого правлячого єпископа Братиславской Єпархіi – Преосвященного владыкы Мiляна Лаха. Торжественну архієрейску літургію вюл Высокопреосвященный Йона – пряшівскій архієпископ і митрополита. Обряд зачал ся по прочытаню євангелия, пак, єпископы – кошыцкій єпарха, владыка Кірил і емеритуваный братиславскiй єпарха владыка Петро, привели нового єпарху Міляна перед митрополиту Йону. Дальше прочытана была булла, котром 6. марця 2026 р. Папа Римскій Лев XIV оголосил выбiр нового правлячого єпископа Братиславы. Пак одбыли ся ключовы моменты церемонii – наслідувал акт усаджыня нового єпархы на єпископскій столец i переданя єпископского жезла з рук митрополиты Йоны. Подiя згромадила гости так со Словациi, як з цiлого свiта, в тым высокых священникiв християньскых церкви зо Словациi, Чех, Украiны, Румуніi, Австриi i ЗША.

Світовый Ден Русинів

Вчера святкували сме Світовый Ден Русинів. В 2017 р. на XIV Світовім Конґресі Русинів, присутны там делеґаты вырішыли, што 23. марця стане дньом целебрациi Русинів. Сес выбiр не был припадком, бо мат припоминати I Світовый Конґрес, якого засіданя одбыло ся в днях 23.-24. марця 1991 рока в Меджелабірцях. Головным орґанізатором I Конґресу была Русиньска Оброда, а його першым ведучым стал Василь Турок-Гетеш. Участныма на тій подіi по долгых роках офіцияльного неістнуваня Русинів были представникы з товдышньой Чехословациi, Польщы, Совітской Украiны, Пiлнічной Америкы і Юґославіi. Мiсийом Конґресу было зачати процес одроджыня во вшыткых обшырях культурно-соспiльного і релiґiйного жытя в членьскых державах, де жыют Русины. Завдякы першому конґресови пак в 1992 р. одбыл ся в Бардиівскых Купелях I Медженародный Конґрес Русиньского Языка, што было початком стандаризациі языка в його вариянтах.

Розбудова дорогы на трасi Репедь-Кальниця-Мхава

В минулым тыжни, в Пiдкарпатскым Воєвiдскым Урядi пiдписано умову на дофiнансуваня розбудовы дорогы i моста на трасi Репедь-Кальниця-Мхава. Проєкт мат вартати близко 9,5 млн злотых, з чого понад 5,6 млн то грошы з буджету державы. На тоту iнвестицию локальне соспiльство ждало уж долгы рокы, бо ішло предовшыткым о безпеку. Єднак треба доповiсти, што сеса траса є тiж частю шляку для туристiв, котры вандруют по полудньово-схiднiй Польщы. Безпосередньо веде она до забытковой церкви в Туриньску, яка была вписана до Спуску Свiтового Дiдицтва UNESCO. Модернiзация дорогы мат притягнути iщы веце оciб заiнтересуваных культуром i iстрийом Пiдкарпатя.

Анкєтовы дослiджыня GUS

Головный Статистичный Уряд в Краковi iнформує, што так як в минулых роках, так i в 2026 Уряд буде вюл анкєтовы дослiджыня в Малопольщы. Форма дослiджынь буде безпосередня або через телефон. Выбiр мiсц i осiб є припадковый. Збераны даны мают быти хоснуваны до державных статистик, але вшыткы будут анонімны. Iнтервю мают быти ведены урядовыма працiвниками, котры мают службовый ідентифікатор выданый Директорм Статистичного Уряду в Краковi. Треба звертати на тото увагу, бо в послiднiм часi штораз частiйше сут пробы крадежы банковых i особистых даных. Веце iнформаций на тоту тему найдете на сайтi Уряду.