Сумар дня на 24. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 24. жолтня/октобра 2024 р.

Одбыл ся Лемківскій Кєрмеш

В остатню неділю, 20. жолтня/октобра в Йонкрес в ЗША одбыл ся дальшый Лемківскій Кєрмеш, якій што рока орґанізує Карпаторусиньскій Америцкій Центр Lemko Hall (Carpatho-Rusyn American Center Lemko Hall). На Кєрмешы зышло ся шумні люди, в тым молоды. Вчас забавы пригрывала русиньска група Lem Joy Trio.

Пряшівскій архієпископ членом Дикастериі про східні церкви

Пряшівскый архієпископ і митрополита Йона Максим был призначеный за члена Дикастериі про східні церкви. В мунилый віторок о тым інформувал Пресовый Центр Ватикану. Окрем кыр Йоны, котрый як раз тепер бере участ в засіданю Синоду єпископів о синодальности, папа Франциск выменувал веце дальшых членів той Дикастериі. Є она єдном з шістнадцетьох дикастерий Римской Куриі, котра має задачу старати ся о східні церкви, якы сут в єдности з Апостольскым Престолом. Была основана в 1917 р. як Конґреґация. Назву змінила в 2022 р. Префектом Дикастериі є тепер кардинал Клаудіо Ґуджеротті. Пряшівскій владыка стал членом Дикастериі на період 5 років. Дикастерия про східні церкви в рамках свойой діяльности зряджує ріжны комісиі і комітеты.

Суботні варштаты в Рускій Бурсі

В найблизшу суботу, 26. жолтня/октобра в прострорах Руской Бурсы в Ґорлицях одбудут ся дальшы творчы варштаты. Тым разом будеме робити вінці з сушеного квітя. Подія зачне ся о 11.00 год. Варштаты буде вела Олена Дуць. Подія є фінансувана завдякы дотациі Міністра Внутрішніх Справ і Адміністрациі. Красні просиме вшыткых – і старшых, і молодшых. Навчыме ся практичного знаня!

Ряшівска дебата о істориі ПАПЦ

28. жолтня/октобра в Конференцийній Сали Президентского Готелю в Ряшові одбуде ся наукова симпозия до темы «Одроджены з Польском Республиком. 100-літя наданя автокефалиі Польскій Православній Церкви». Вчас конференциі выступлят прелеґенты з Польщы і заграниці. Подія зачне ся о 10.00 год. Вступне є дармо. Головным орґанізатором є Осередок Православной Культуры Ельпіс в Ґорлицях. На афішы, якій інформує о подіі, поміщено знимкы повязаны з одрожыньом православя як раз на Лемковині в 20. і 30. роках ХХ ст.

В суботу пшемківскы Стрічы

Припоминаме, што уж найблизшый вікенд 26.-27. жолтня/октобра на Нижнім Шлеску одбудут ся XVII Стрічы Трьох Поколінь з Лемківском Культуром. Орґанізатором єст Стоваришыня Лемків. В рамках подіі одбудут ся два концерты, першый в суботу о 16.00 год. в Пшемківскым Осередку Культуры і другій в неділю о 16.00 год. в Авли Комплексу Шкіл в Польковицях. В концертах выступит Лемківскій Ансамбль Пісні і Танця «Ластівочка» разом з запрошеныма гістми.