Сумар дня на 25. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 25. листопада/новембра 2025 р.

Вмер Ігор Дуда, пропаґатор жывого лемківского слова

З жальом інформуєме, што 23. листопада/новембра одышол до вічности Ігор Дуда, пропаґатор жывого лемківского слова, публициста, педаґоґ і автор лемківского словника. Вродил ся 13. марця 1940 р. в Ганчовій. В наслідстві выселінь в 1945 р. на Радяньску Украіну нашол ся зо свойом родином на чужыні. До рідного села вертал не раз, в тым тіж в ріжных авторскых формах. Скінчыл в 1973 р. Інститут Малярства, Різбы і Архітектуры ім. І. Рєпіна Академіі Штук в Ленінграді. В роках 1991-2021 был директором Тернопільского Облатсного Артистичного Музею, а од 2005 рока доцентом Тернопільского Нацийонального Педаґоґічного Універистету. Од 1999 рока як шефредактор вюл часопис «Дзвони Лемківщини», был тіж орґанізатором першой в Украіні Лемківской Ватры – Гутиска 1998 р. Ігор Дуда был ціненым автором, печатал вельо книжок – м.ін. з языкознавства. В 2011 році выпустил друком авторскій «Лемківский словник», был тіж автором книжкы «Лемківскій гумор». Аж до смерти хоснувал богату і чысту лемківску бесіду. Вічна Йому Памят!

«Деревяне серце Карпат – спадковина і будучніст»

Стоваришыня для Розвитку і Промоциі Підкарпатя «Pro Carpathia» поіформувало, што першого дня 2026 рока зачне реализацию проєкту «Деревяне серце Карпат – спадковина і будучніст». Проєкт реализуваный буде на обшыри підкарпатского воєвідства і пряшівского краю. Участ в його реализациі по польскій страні берут Музей Народного Будівництва в Саноку і Підкарпатска Реґіональна Туристична Орґанізация, а по словацкій партнером проєкту єст Словацкій Нацийональный Музей – Музей Украіньской Культуры. Цілю єст підпора трансграничной спілпрацы в обшыри охороны, заряджаня і промоциі деревяной архітектуры. В рамках проєкту плянуваны сут варштаты вказуючы традицийны технікы будуваня, школіня з заряджаня обєктами і діґітализациі, одкрытя трансграничной сіти спілпрацы медже інституциями та опрацуваня авдийопровідинків і віртуальных спацерів по деревяных обєктах архітектуры. Задача спілфінансуваня єст Европейском Унійом в рамках проґраму Interreg Польща-Словация.

«Піднебесны роверы» нова атракция Мушыны

Мушына буде мала нову, выняткову атракцию. «Піднебесны роверы» то получыня роверів і тиролкы з можливістю обзераня краєвидів. Такы атракциі функцийонуют в Бельґіі ци Даніі, а тота в Мушыні буде першом в Польщы. Ґміна має уж забезпечены грошы на тоту ціль та готовы вшыткы формальносты. Початком 2026 рока оголосит конкурс на реализацию задачы. Тиролька найде ся в Родинным Парку «Башта» над потоком Щавник. Кошт новой атракциі то коло 5 мілийонів зл.

Шляком Лемків на Волтушову

Бюро Туристичной Інформациі в Рыманові просит до участи в прогульці «Шляком Лемків на Волтушову». Подія пройде в середу 26. листопада/новембра і зачне ся о год. 14.30 при Пияльні Мінеральной Воды в Рыманові. В часі спацеру провідник оповіст о істориі села та доли його жытелів. Вступ платный символичне 10 злотых.