Сумар дня на 25. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 25. лютого/фебруара 2022 р.

Росийска Федерация атакує Украіну

Вчера, 24. лютого/фебруара, над раном Росийска Федерация заатакувала Украіну. Президент Росиі Владимір Путін выдал розказ мілітарной операциі цілю «демілітаризациі Украіны». Росийскє войско зачало інтенсивно острілювати ракєтами войсковы єдиниці і аеропорты. Колоны росийскых войск і танків перекрочыли східні, полудньовы і пілнічны границі. В цілій державі оголошеный был воєнный стан. Медиі доносят о збільшаючым ся чыслі жерв атаків, в тым цивілів. Росийскы силы заняли і атомну електровню в Чорнобыли. За словами Президента Украіны Володиміра Зеленьского є то деклярация войны проти цілій Европі. Зарядил він загальну мобілизацию. Атакы ся не кінчат. Днес над раном росийскы силы зачали дальшы бомбардуваня. Бомбы были зошмарены м.ін. на мешкальны будинкы в Кыйові. Росийскы силы фурт ся мобілизуют при украіньскій столици. Тяжкы боі продолжуют на сході Украіны. Сирены вызвучали днес і в барз близкым нам ґеоґрафічно Львові. Вельо жытелів Украіны рішыло втікати перед войном, а на границях творят ся вельогодинны чергы. Тоты цивілі, котры остали, хоронят ся м.ін. в підземлях метра.

Высловлюєме нашу солідарніст Украіні

Свою незгоду на войсковый атак Росиі на Украіну высловили уряды, орґанізациі і громадяне на цілым світі. І мы высловлюєме нашу солідарніст Украіні. На Украіні жыє русиньска (лемківска) соспільніст, хоц не сут ім признаны права. Лем.фм творят і редакотры, котры походят як раз з Украіны, вєдно з нами сут Лем.фм. Высловлюєме солідарніст нашым русиньскым братям і сестрам, котры жыют на Украіні, але і вшыткым жытелям Украіны, цілій украіньскій державі. Жебы помочы Украіні мож взяти участ в єдній з чысленных колект, веденых такыма орґанізациями як Come back alive, Army SOS, Szpitalnicy, Skrzydła Feniksa, Vostok SOS, Voices of Children, Solidarni z Ukrainą ци Польском Гуманітарном Акцийом. Важне, жебы перед переданьом грошів провірити, ци вплачаме на конто правдивой фундациі. Некотры орґанізациі ведут тіж збіркы медичного ґратя, облечыня і вшыткого того, што ся може придати на войні.

76. засіданя СКУтНіЕМ

На днес, 25. лютого/фебруара, было вызначене 76. засіданя Спільной Комісиі Уряду та Нацийональных і Етнічных Меншын, скликане на внесок Спілведучого Комісиі, будучого представником меншын і соспільности хоснуючой реґіональный язык. Темом стрічы єст «Інформация Міністра Нацийональной Едукациі і Наукы на тему діянь підниманых в обшыри меншыновой освіты, а особливо змін права тыкаючых вчыня німецкого языка як языка нацийональной меншыны та зменшыня части загальной освітовой субвенциі для єдиниц територияльного самоуряду в 2022 році». Припомнийме, же розпоряджыня Міністра Едукациі і Наукы Пшемыслава Чарнка зменшыло вымір вчыня німецкого як языка меншыны з трьох годин до єдной. Было то безпосередньо спричынене рішыньом Сойму зменшыти середкы на вчыня меншыновых языків о близко 40 млн злотых.

Ковідовы ограничыня зменшены

В середу, 22. лютого/фебруара, в часі пресовой конференциі польскій премєр Матеуш Моравєцкій подал найновшы інформациі звязаны з пляном зменшаня ковідовых огранишынь. Уж од 1. марця має быти одкликана більшіст рестрикций о економічным характері. Утриманы будут лем ограничыня звязаны з ізоляцийом і кварантанном, та обовязок носити масочкы в публичных місцях.