Сумар дня на 25. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 25. лютого/фебруара 2025 р.

Слідами бывшого пчолярства і бортництва 

Музей Дворы Карвациянів і Ґладышів зачал реализацию трансграничного проєкту присвяченого істориі пчолярства і бортництва в Низкым Бескіді і на Ораві. Як передала представничка Музею, на Погірю праві в каждым селі были пчолярі, а першы споминкы о бортництві вказали ся в документах Казімєжа Великого. Додатковым доказом сут аж і назвы сел в Низкым Бескіді, як нп. Бортне. В рамках реализациі проєкту в скансені в Шымбарку музей одкрыє нову постійну выставу, з забытковыма експонатами і історичныма улиями. Не бракне і многых варштатів ци прелекций до темы. Выстава буде одкрыта для звиджаючых в вакацийным періоді. Подібны експозициі найдут ся в Зубжыци Ґурній на Ораві і по словацкій страні в Зуберци.

Ґорлицкій рынок в ремонті

Онедолга на ґорлицкым рынку пройде зміна орґанізациі руху. Єст то спричынене початком направы верхньой верствы на улицях старшой части міста. Як передал віцебургомайстер Ґорлиц Себастиян Пухайда, вшыткы улиці, котры были вкрыты бруківком, мают значны знищыня і сут загорожыньом для дорогового руху і для пішых.  Ведены експертизы вказали, што при попередній выміні верхньой верствы дошло до блудів по страні проєкту і выконавців інвестициі. Місту удало ся одзыскати понад 700 тис. зл одшкодуваня од першой фірмы з 17 млн. зл, котры перезначено на реновацию. Актуальны поправкы будут коштувати близко мілийон злотых і згідні з пляном закінчат ся в половині квітня/апріля.

Команча в оповіданях і легендах – літературный конкурс

Ґміна Команча просит до участи в літературным конкурсі «Леґенды звязаны з ґміном Команча». Конкурс адресуваный єст не лем до жытелів ґміны, але каждого, кому близка єст Команча, без взгляду на вік. Каждый участник може зголосити лем єдну, скорше непубликувану працу. Представлены леґенды мусят быти звязаны з ґміном Команча, єй історийом, героями або подіями. Цілю конкурсу єст промуваня культуровой і історичной спадковины ґміны через творіня оповідань, але тіж інспіруваня до активной творчости і розвитку літературовых талантів. Працы мож зголошувати до 30. квітня/апріля, а оголошыня результатів пройде 9. мая. Для лавреатів орґанізаторы зрыхтували нагороды, а выріжнены працы будут публикуваны на офіцийным сайті Ґміны Команча.

«Пересвітліня» Лемковина очами Аліциі Пшыбышовской

В Малій Ґалериі Фотоґрафіі Музею Істориі Міста Перемышль мож обзерати выставу авторства Аліциі Пшыбышовской пн. «Пересвітліня» презентуючу Лемковину і жытя на пограничы. Артистка, родом з новосандецкого реґіону, єст абсольвентком вроцлавской Академіі Красных Штук. При творіню выставы хоснувала техніку накладаных на себе образів. В тот спосіб вказує перениканя минулого з теперішнім. Як описує выставу сама Пшыбышовска, Лемковина то для єдных маґічна краіна, для інчых хыжа, місце одпочынку, але тіж місце тяжкых споминів. Головном цілю авторкы было передати енерґію того місця, люди, традициі і символы. Выставу мож обзерати в перемышльскій Ґалеріі до 5. марця.