Сумар дня на 25. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 25. лютого/фебруара 2026 р.

Европейскій Форум Спадковины І Світовой Войны в Ґорлицях

Уж заран в Ґорлицкым Центрі Культуры одбуде ся Европейскій Форум Спадковины І Світовой Войны. Подія орґанізувана єст в рамках медженародного проєкту «GOV4PeaCE» спілфінансуваного через Европейскій Фундуш Реґіонального Розвитку в рамках проґраму Інтерреґ. Підчас Форуму одбудут ся Медженародны Торгы Спадковины І Світовой Войны – своі стоіска будут презентувати інституциі, якы занимают ся історийом і спадковином І світовой войны з заграниці і з Польщы. О 11.30 год. одбуде ся панель пн. «В страну Карпатского Шляку Миру: Творіня Спійного Шляку Миру в Серединно-Східній Европі». По панели пройде пісписаня листу попертя для основаня Музею І Світовой Войны в Ґорлицях. Ідею цілого проєкту єст охорона і промоция спадковины І світовой войны. Хотят тіж выпрацувати сучасны моделі заряджаня сесом дідовизном в контексті зрівноваженого розвитку. Заранішня подія єст одкрыта для вшыткых заінтересуваных історийом, туристиком, едукацийом ци медженародном спілпрацом. Вступне дармо.

Одкрытя Салі Никыфора – нового, мультімедияльного простору в Креници

В найблизшу пятницю в Діґітальным Кіні – Яворина ІІ одбуде ся торжественне одкрытя Салі Никыфора – нового, мультімедияльного поміщыня, котре посвячене буде єдному з найбарже вынятковых артистів звязаных з Креницьом. То камеральне місце, в котрым вшытко – од світла по звук, помагат войти в світ Никыфора – Епіфана Дровняка. Через шіст стреф мож одкрывати його штуку, штоденніст і Креницю, яку виділ артиста. Як заповідат орґанізтор – Центр Культуры в Креници – одкрытя салі і выставы «Никыфор – моє місто, а в ним…» єст аж початком. Буде того веце. Підчаст подіі выступит Екстремальна Театральна Ґрупа з Бересту зо спектакльом «Никыфор і Кєпура» та Співоча Ґрупа «Оспіваны з Бересту». Початок подіі 15.00 год.

Інжынєрия вытинкы і обробкы дерева – новый сектор в саноцкым скансені

Музей Народного Будівництва в Саноку, по понад двадцетьох роках плянуваня, рыхтує створити новый сектор. Окрема част в скансені буде посвячена таємницям карпатского лісництва. В четвер 19. лютого/фебруара директор Музею Народного Будівництва в Саноку Марцін Кровяк та представникы Реґіональной Дирекциі Державных Лісів в Коросні бесідували о конкретных кроках для основаня лісного сектора. Концепция закладат перенести до скансену м.ін. зреконтрууване деревяне бюро надлісництва з 50. років минулого столітя – в середині будут давны архіва, мундуры і одзначыня. В окремым будинку – колибі, буде запрезентувана сезонова робота рубачів і нарядя, котре хоснували. Буде експозиция посвячена дегтярсту, мазярству, выпаляню угля (скансен має уж першы реторты). В найблизшых тыжнях робітникы музею рушат в терен, жебы перезріти вытипуваны будинкы, котры будут переносити.

В Высовій змодернізуют курортный парк

Закінчыл ся конкурс оферт на розбудову Курортного Парку в Высовій. Ґміна Устя Рускє выбрала выконавцю робіт – буде ньом фірма РТ-Буд з Бортного. Плянувана модернізация обнимат ремонт амфітеатру з оточыньом, штырьох альтан, тоалет і мостків над потоком. Змодернізуют тіж пияльню воды, а обшыр парку буде загосподарувана з поділом на тематичны части – появит ся едукацийна стрефа з пляцом забав, стінком до спинцуваня і природничом інфраструктуром. Буде тіж рекреацийна част для активного выпочынку на свіжым повітри. Друга фірма займе ся роботами при деревах, кряках і рештом рослинности в Парку – в тым примірі найліпшу оферту зложыла фірма Бато-Малопольща з самой Высовой.