Сумар дня на 25. марця 2022 р.

Приносиме вам сумар медияльной ґрупы ЛЕМ.фм+ на ден 25. марця 2022 р.

Номінациі до Нацийональной Преміі Pro Arte Ruthenorum 2022

До 15. квітня/апріля мож зголошувати номінациі до Нацийональной Преміі за русиньскій кумшт ім. Івана Манайла „Pro Arte Ruthenorum” – 2022. Премія была основана Світовым Конґресом Русинів довєдна з Русиньскым Нацийональным Самосправуваньом міста Вац на Мадярах, на засіданю Конґресу в 2019 р. Цілю основаня преміі є підпорити і нагородити тых вызнаных сучасных русиньскых артистів, котры свойом творчістю міморядно діют для сохранія, розвитку і пропаґациі світовой русиньской штукы. Премія складат ся з трофею, диплому і материяльной підпоры артистичной діяльности лавреата в формі творчых материялів. Премійом каждый рік нагороджуваный єст єден вызнаный русиньскій творця на основі рішыня жырі комісиі про культуру Світовой Рады Русинів. Право предкласти зголошыня до номінациі має каждый жадаючый. Жырі підойме рішыня до кінця квітня/апріля, а торжественне вручыня преміі одбуде ся в часі Медженародного Бієнале Лемківской/Русиньской Культуры, якє пройде в Креници 28. і 29. мая тр.

Стріча представників Культурного Товариства Русинів Румуніі з председом Руской Маткы в Сербіі

Як інформувала аґентура Рутенпрес, в Новым Саді стрітили ся новый председа орґанізациі Руска Матка Михайло Фейса і представникы Культурного Товариства Русинів Румуніі на челі з председом Ґеорґійом Фірцаком. Стріча проходила в місті, в котрым в 2023 р. одбуде ся 17. Світовый Конґрес Русинів. Орґанізация конґресу была єдном з головных тем стрічы. Припоминийме, же на посліднім конґресі в Креници Світова Рада Русинів схвалила, же конґрес в 2023 році пройде в Румуніі. Єднак перед голосуваньом, председа Руской Маткы жадал, жебы голосувати і о Новым Саді. Обі делеґациі не доєднали ся на компроміс. Наконец в голосованю делеґаты потвердили слідуючій конґрес в Новым Саді. Подля аґенциі Рутенпрес, третій ден Конґресу міг бы єднак проходити в Румуніі. Мало бы то быти дале бесідуване на наступным засіданю Світовой Рады, якє буде в Креници.

Карпатска Стріча онляйн

Карпатскє Товариство просит на «Карпатску Стрічу онляйн», яка одбуде ся в четвер, 31. марця, о 19.00 год. Прелекцию пн. Медженародны Фольклорны Стрічы «Gorolski Święto» як культурно-соспільный феноменон на чешско-польско-словацкым пограничы выголосит Лешек Ріхтер. В стрічы буде мож взяти участ через плятформу Zoom або обзерати перенос в сервісі YouTube. Веце дрібниц на вебсайті орґанізатора.

Мерилін Монро Енді Варголя найдорожшым образом ХХ столітя

Образ Мерилін Монро авторства Енді Варголя буде в маю тр. выставленый на продаж нюйоркскым авкцийным домом Крістіз. Ціна, од котрой зачне ся ліцитация, є рекордова – то 200 млн дулярів. Енді Варголь зробил образ в 1964 р., два рокы по смерти акторкы. Од початку задуманый был як сучасна, світска ікона – портрет фільмовой звізды славленой мілийонами на цілым світі. Образ має наголовок Shot Sage Blue Marilyn і намалюваный є в типовым для Варголя стили. Властительом образу єст швайцарска фундация занимаюча ся філянтропійом. Офіцияльні грошы з продажы будут переданы на благодійны ціли. Як подає Ройтерс, кєд 200 млн дулярів потвердят як ціну, од котрой буде мож зачати ліцитувати, то Shot Sage Blue Marilyn буде найдорожшым образом ХХ ст., котрый коли-небуд выставили на авкиці.