Сумар дня на 25. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 25. серпня/авґуста 2025 р.

ПУЛС запрезентує ся в японьскым місті Осака

Професийональный русиньскій ансамбль – Піддукляньскій Умелецкій Людовый Субор, тот рік святкує 70 років од свого выникнутя. Як інформувало Одділіня комунікациі Пряшівского Самосправного Краю, котрый є зряджувательом ансамблю, колектив при тій нагоді на кінци того рока одпремєрує новый ціловечерный проґрам. ПУЛС за 70 років свого істнуваня выступил в многых краінах, не лем на европейскым континенті. Уж в найблизшых днях зо своім репертуаром запрезенує ся на світовій выставі EXPO 2025 в японьскым місті Осака, де буде головным пунктом ґаляпроґраму підчас Нацийонального Дня Словациі. Веце про ювілята прочытате в дописі на нашым портали.

Ближыт ся праздник священномученика Максима Ґорлицкого

Православна парохія святой Тройці в Ґорлицях просит до участи в торжественных богослужынях з нагоды дня памяти священномученика Максима Ґорлицкого, якы будут там проходити в днях 5.-.6 вересня/септембра. В пятницю 5. вересня/септембра, в передден свята, о 17.00 год. буде служена Всеночна. В ден святя о 6.00 год. буде правлена ранішня Літургія, пак о год. 8.00 акафист перед мощами св. Максима. О год. 9.45 привитаны будут прибывшы владыкы, а о 10.00 пройде головна свята Літургія. В тым році черговый раз одбуде ся піше поломництво орґазнізуване Братством Православной Молодежы Перемышльско-Ґорлицкой Єпархіі, з благословліня архієпископа Паісия, владыкы перемышльско-ґорлицкого. VIII піше поломництво з рідного села Максима Сандовича – Ждыни, до Ґорлиц одбуде ся 5. вересня/септембра. Зачне ся о 5.00 год. рано в церкви Покровы Пресвятой Богородиці, в котрій был хрещеный св. Максим. Там буде служена Божеска Літургія. Пак поломникы підут через Ґладышів на Маґуру, до Маластова, Ропиці Руской, через Санкову і Сяры до Ґорлиц. Зголошыня мож подавати до 4. вересня/септембра до Братства Православной Молодежы Перемышльско-Ґорлицкой Єпархіі.

Торжества в ден памяти святого Максима Ґорлицкого пройдут і в ЗША

Праздник священномученика Максима Ґорлицкого святкувати будут і родакы в Зъєднаных Штатах Америкы. Богослужыня одбут ся 5. і 6. вересня/септембра в церкви св. Миколая в Стратфорд в штаті Конектікат. По святочній Літургіі, яка буде проходила в суботу 6. вересня/септембра од 8.00 год., буде выклад і почастунок. Прелекцию з наголовком «Мучеництво святого Максима Сандовича і оборона православія днес» выголосит діакон Давид Дутканич. Подія зачне ся о 1.00 год. Білеты на подію мож придбати онляйн на сайті парохіі. Грошы за вступне будут переданы на реставрацию ікон находячых ся в святыни.

В Виноградові одпрезентували нову книжку Александра Керестеші

В четвер 21. серпня/авґуста в Виноградівскій Центральній Публичній Бібліотеці одбыла ся презентация книжкы русиньского писателя Александра Керестеші під назвом «Пійсят из Човлентом». Літературну подію орґанізувало Закарпатскє Областне Науково-Культуролоґічне Общество імени Александра Духновича. Вызувучали вершы Александра Керестеші, приговоры русиньскых діячів і музичный проґрам. Веце на тоту тему прочытате в дописі на нашым портали.