Сумар дня на 25. січня/януара 2024 р.

Приносиме вам сумар медияльной ґрупы ЛЕМ.фм+ на ден 25. січня/януара 2024 р.

Представникы віроісповідань і нацийональных меншын в Президента

23. січня/януара Президентска Пара витала в президентскым палаци представників Церкви і конфесийных звязків в Польщы. Участ в стрічы взяли тіж представникы меншын – члены Спільной Комісиі Уряду та Нацийональных і Етнічных Меншын. Перше слово до згромадженых мал президент Дуда. Пак голос забрали представникы парох віроісповідань. Православну церков репрезентувал митрополита варшавскій і цілой Польщы Сава і архієпископ Юрий, владыка вроцлавско-щеціньской єпархіі ПАПЦ. Грекокатолицку церков репрезентувал владыка Аркадий, єпископ ольшыньско-ґданьскій УГКЦ. Вчас подіі як репрезентант меншыновой страны голос мал Григорий Куприянович, спілведучый СКУтНіЕМ. Навязал до недавного рішыня Інситуту Нацийональной Памяти вс. акциі «Вісла». «Єдным з нерозрахуваных комуністичных злочынів, тіж в правным контексті, єст акция Вісла, яка была брутальном, пацифікацийном выселенчом акцийом, веденом подля нацийональной критериі. Ґрупы, якы досвідчыли того комуністичного злочыну, барз заболіло скандаличне поясніня рішыня прокуратора ІНП о ремісиі слідства в справі акциі Вісла» – пояснил перед згромадженыма.

Лемківска хыжа памяти Новосільского

В Одреховій – рідным селі Юрия Новосільского, з ініциятивы Стоваришыня Локальна Ґрупа Діяня Доріча Вислока, возникне лемківска хыжа памяти о артисті. З огляду на коріня Новосільского в Одреховій, локальны активісты рішыли, жебы в селі нашол місце культурный осередок, якій буде припоминал о творчости лемківского артисты, а при тым буде місцьом близкым туристам і сучасным творцям. Хоц традицийны лемківскы хыжы были деревяны, то сідиба лемківской хыжы памяти Новосільского буде в муруваным будинку. Ініциятива єст реализувана при фінансуваню Міністерства Культуры і Нацийональной Спадковины. В місци будут выставы і варштатовы салі. Локальны активісты старают ся заохочувати до діяня жытелів Одреховой і дальшых сусідніх сел. В лемківскій хыжы Новосільского мают м.ін. быти вказуваны працы, якы будут припоминати о лемківскым походжыню Новосільского.

Поміч найменьше розвиненым реґіонам ПСК

Понад 7 мілийонів евро з акчных плянів трафит до найменьше розвиненых окресів в Пряшівскым Самосправным Краю. Державный секретар Міністерства Інвестиций, Реґіонального Розвитку і Інформатизациі Михал Калиняк в понедільок 22. січня/януара стрітил ся в рамках ресортного дня в Пряшові з м.ін. з пріматорами найменьше розвиненых окресів і інформувал о приготовлюваній зміні леґіслятивы. Вшыткы найменьше розвинены окресы сут приграничны, і так можут здобыти більше грошів з польско-словацкых черезграничных проєктів. То м.ін. реґіоны, в якых чысленно жыют Русины.

Польковицкій спектакль сеньорів

Як інформує місто Польковиці, спектакльом «В нас на селі» польковицкы сеньоры з театральной ґрупы «Na przekór», діючой при Центрі Культуры влучыли ся до Великой Оркєстры Святочной Помочы. За підтриманя акциі публика могла обізрити сельску оповіст з гумором. Не был то першый выступ того театрального колективу. Пєса «В нас на селі», на основі текстів Казімєжа Пшервы-Тетмаєра і Славомира Мрожка, была выславлена в кіні – премєра была в жолтни/октобрі минулого рока. Представліня польковицкых сеньорів то свого рода початок великого фіналу Великой Оркєстры Святочной Помочы, якій буде уж в найблизшу неділю, 28. січня/януара.