Сумар дня на 26. мая 2025 р.

Приносиме вам сумар медияльной ґрупы ЛЕМ.фм+ на ден 26. мая 2025 р.

XXXV Православне Поломництво на Святу Гору Явір

В суботу 12. липця/юлия, в ден святых Апостолів Петра і Павла, православны Лемкы традицийно зыйдут ся на торжестві на святій Горі Явір. Як поінформувало Братство Православной Молодежы Перемышльско-Ґорлицкой Єпархіі, з благословліня архієпископа Паісия в днях 10-12. липця/юлия одбуде ся ювілейне 35. Православне Поломництво на Святу Гору Явір, в 100. Річницю Обявліня ся Лемкам Богородиці. Зголосити свою участ в поломництві мож в Наталиі Урды або Фомы Болеха до неділі 6. липця/юлия – дрібниці мож найти на фейсбуковій стороні Братства. Поломництво зачне ся од св. Літургіі в четвер 10. липця/юлия о 8.00 год. в православній церкви св. Владиміра Великого в Креници. Першого дня поломникы перейдут трасу до Баниці. Другого дня, в пятницю о 8.00 рано на місцевым цмонтери одслуженый буде парастас за помершых жытелів Баниці. Пак поломникы підут через Снітницю, Ставишу і Ріпкы до Ганчовой. О 17.00 год. в велию свята Первоверховных Апостолів Петра і Павла служена буде Всеночна в церкви Покровы Пресвятой Богородиці в Ганчовій. В суботу о 7.00 рано, в сам ден праздника, в ганчівскій церкви служеный буде молебен, а пак поломникы перейдут до Высовой. О 9.00 год. при церкви Архістратига Михала в Высовій привитаны будут прибывшы єпархы, а пак вірны выйдут на верх Святой Горы Явір. Свята Літургія на Горі Явір зачне ся о 10.00 год.

До Сойму трафил проєкт закону о вызнаня шлезского за реґіональный язык

Як поінформувала на своім фейсбуковым профіли посланкыня Моніка Роса з Громадяньской Коаліциі, зложыли проєкт закону о вызнаня шлезского языка за реґіональный язык. В маю минулого рока устава тота была заветувана президентом Анджейом Дудом. Як подала посланкыня, рахуют, што о пару місяців проєкт стане ся обовязуючым правом.

Музей Енді Варголя в Меджелабірцях плянуют одкрыти на яр будучого рока

Музей Модерной Штукы Енді Варголя в Меджелабірцях, єден з двох музеів Варголя на світі і єдиный в Европі, є од марця 2023 р. запертый – переходит велику реконструкцию. Як в минулу пятницю 23. мая інформувал Пряшівскій Самосправный Край, котрый заряджат музейом, будовляна част проєкту є успішні на своім фіналі. Музей єст змодернізуваный і перебудуваный згідно з первістныма плянами і візиями. Нашли ся там новы експозицийно-едукацийны просторы, амфітеатр ци зелены елементы, такы як зелена веґетативна стріха. Модернізацию прошли так само технолоґіі, в тым систем безпекы. Кошт перебудовы то близко 13,2 млн евро. Музей тепер жде дальша фаза, в котрій будут рішаны елементы інтерєру. Згідні з пляном музей мал бы быти одкрытый на яр 2026 р. Деталі чытайте на нашым портали.

Плястичный конкурс «Я i Никыфор» – зголошыня лем до найближшой суботы

Припоминаме, што іщы лем до найблизшой суботы 31. мая мож взяти участ в плястичным конкурсі для діти під наголовком «Я i Никыфор», якій орґанізує Стоваришыня «Руска Бурса» в Ґорлицях. Реґулямін конкурсу найдете на нашым сайті в закладці Подіі. Плястичны працы мают односити ся до творчости Епіфана Дровняка – Никыфора. Конкурс є презначеный для вшыткых учеників кляс основной школы і предшколяків. Єден автор може зголосити лем єдну працу в форматі A4. Передвиджено атракцийны нагороды!