Сумар дня на 26. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 26. серпня/авґуста 2024 р.

Православне поломництво на свято священномученика Максима Ґорлицкого

В будучым тыжни православны Лемкы зыйдут ся в ґорлицій катедрі, з нагоды дня памяти священномученика Максима Ґорлицкого, якій припадат на 6. вересня/септембра. В передден свята покровителя перемышльско-ґорлицкой єпархіі, в четвер 5. вересня/септембра, одбуде ся з благословліня архієпскопа Паісия семе піше поломництво зо Ждыні до Ґорлиц. О 5.00 год. рано в церкви Покровы Пресвятой Богородиці в Ждыни, в котрій крещеный был св. Максим, буде служена св. Літургія, а пак поломникы підут до Ґорлиц через Ждыню, Ґладышів, Маластівску Маґуру, Прислоп, Новицю, Білянку, Шымбарк і Ропицю Польску. О 17.00 год. в катедральній церкви в Ґорлицях зачнут ся вечырні богослужыня. Вшыткы охочы взяти участ в поломництві можут ся зголошувати до Фомы Болеха, Наталиі Урды, о. Юлияна Феленчака і о. Ярослава Ґрича до середы 4. вересня/септембра.

В Ґорлицях одбыл ся вернісаж выставы творів Новосільского

В минулый четвер 22. серпня/авґуста в Ґалериі Штукы Двір Карвациянів в Ґорлицях одбыл ся вернісаж выставы пн. «Юрий Новосільскій – поворот домів», яка походит з колекциі Нацийонального Музею в Кракові. Як підкрислила директор Музею Двір Карвациянів і Ґладышів Катажына Шепєнєц, в звязку з выставом обєкт мусіл быти достосуваный до вымогів Нацийонального Музею в Кракові, котрый выпожычыл понад 20 творів артисты. То предовшыткым вымогы безпекы, з огляду на вартіст презентуваных образів. Як подала директор музею, тот вынятковый вернісаж притягнул до Двору Карвациянів много любителів штукы, в тым вельо молодых осіб. Припомнийме, што єст то першый раз, коли творчіст Юрия Новосільского, знаменитого маляря, рисовника, сценоґрафа, але тіж теолоґа, а для вельох – найвыдатнійшого сучасного маляря ікон, єст шыроко презентувана так близко його рідной землі – лемківской Одреховой, одкале был отец Новосільского. Краєвиды Лемковины з єй архітектуром мож стрітити на вельох образах артисты. Выставу в Ґорлицях мож обзерати до 13. жолтня/октобра тр.

Минуло 70 років од основаня православной парохіі в Кошалині

В тым тыжни православна парохія в Кошалині буде святкувала 70. річницю свого істнуваня. Ювілены подіі потырвают два дни і одбудут ся в получыню з праздником Успіня Пресвятой Богородиці, якій припадат на 28. серпня/авґуста. Кошалиньска парохія была основана в 1954 р. з думком о православных, котры трафили на тоту землю в результаті воєнных діянь ІІ світовой войны і Акциі Вісла. В першых роках парохія была зріжницювана під национальным взглядом. В єй склад входили Полякы, Лемкы, Орміяне, Украінці, Білорусины і Росияне. Ювілейны богослужыня зачнут ся заран о 17.00 год. всеночном. В торжестві возме участ архієпископ вроцлавско-щеціньскій Юрий. В середу святочны богослужыня будут проходити од 8.00 год, о год. 9.30 буде привитаня гости і головна Літургія.

«Прогулька слідами Лемків до Волтушовой»

Бюро Туристичной Інфорамциі Рыманів просит на «Прогульку слідами Лемків до Волтушовой». Провідник оповіст о істориі села і доли його давных жытелів. Прогулька пройде в найблизшу середу 28. серпня/авґуста. Початок о 14.00 год. при Пияльни Мінеральной Воды. Прогулька потырват дві годины, вступне 5 злотых.