Сумар дня на 26. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 26. серпня/авґуста 2025 р.

Што любиме, а чого не любиме в краєвиді Низкого Бескіду? Соспільный діалоґ в ґміні Крампна

Стоваришыня «Руска Бурса» в Ґорлицях просит на дальшу стрічу присвячену будучности Низкого Бескіду, котра пройде в ґміні Крампна. Бесіда ведена буде в формі соспільного діалоґу, де жытелі, орґанізациі ци власти можут представити свою опіню, потребы і обавы. Стріча зачне ся од загального звіданяЧ што любиме, а чого не любиме в краєвиді ґміны Крампна і Низкым Бескіді. Стрічы то першый етап проєкту «Спільный краєвид» реализуваного Стоваришыньом «Руска Бурса» в Ґорлицях. Проєкт закладат проведіня в ґмінах на обшыри Лемковины досліджыня потреб жытелів і того, як постерігают Низкій Бескід. Внескы з бесід будут основом при творіню анкєты, потрібной в дальшій части досліджыня. Стріча пройде в середу, 3. вересня/септембра о 13.00 год. в Уряді Ґміны Крампна. Особливо прошены сут жытелі ґміны Крампна.

Фестіваль Музикы Заклятой в Дереві

Малопольска Туристична Орґанізация та Малопольскє Воєвідство і партнеры просят на тогорічну едицию Фестівалю Музика Заклята в Дереві. Цілю фестівалю єст ожывліня забытків находячых ся на  Шляку Деревяной Архітектуры. Подія пройде в штырі остатні дни серпня/авґуста, в штырьох ріжных локализациях. Інавґурацийный концерт одбуде ся при церкви св. Якова в Поворознику. Дальша част фестівалю пройде в амфітеатрі в Высовій та при церкви в Квятони. Фіналовый концерт буде в костелі свв. Якова і Филипа в Санковій, а на сцені запрезентує ся дует Юлия Дошня і Мирослав Боґонь. На каждый з концертів вступне дармо.

Музей Дворы Карвациянів і Ґладышів отримат дофінансуваня в проґрамі Европейскы Фонды для Малопольщы

Заряд Малопольского Воєвідства выбрал до дофінансуваня в проґрамі Европейскы Фонды для Малопольщы наступных 25 проєктів. Тыкают они енерґетичной трансформациі, інфраструктуры інституций культуры та підпоры реґіональной туристичной оферты. Цілый кошт дофінансуваня то понад 167 млн зл. Найбільше, бо понад 80 млн перезначеных буде на енерґетичну трансформацию. Близко 45 млн зл забезпечено на інвестициі в малопольскы музеі. Проєкт закладат партнерску спілпрацу шестьох інституций культуры Малопольского Воєвідства, серед них находит ся м.ін. Музей Дворы Карвациянів і Ґладышів в Ґорлицях, де дофінансуваня уможливит адаптацию обєктів в Шымбарку до выставенничо-культуральных функций. Додатково ведена буде модернізация і допосажыня постійной выставы в Дворі Карвациянів в Ґорлицях.

Неодолга зачне ся будова новой церкви в Кракові

Уж в жолтни/октобрі рушат роботы звязаны з будовом православной церкви в Кракові. Як передал отец Ярослав Антосюк, парох православной парохіі, дотеперішня каплиця при улици Шпитальній єст уж за мала і не містит збільшаючого ся чысла вірных. Парохія отримала уж вшыткы позволіня на будову, а тепер жде на полну выціну інвестициі. Тяжко тепер повісти, як долго тырвал буде цілый процес, бо єст то міцно звязане з фондами. Будова церкви то громадска ініциятива, фінансувана головно з жертв вірных і любителів. Духовны рахуют єднак на проведіня колект фондів в цілій Польскій Автокефальній Православній Церкви. Новый храм покровы свв. Кірила і Методия, апостолів Славян, найде ся при ул. Віослярскій. За проєкт святыйі одповідают Михал Балаш і Ольга Гайдучень.