Сумар дня на 26. січня/януара 2022 р.

Приносиме вам сумар медияльной ґрупы ЛЕМ.фм+ на ден 26. січня/януара 2022 р.

Выремонтуют корыто Криничанкы

До пляну робіт Польской Водной Господаркы Польскы Воды на 2022 рік был вписаный ремонт корыта потока Криничанка і гыдротехнічного ґратя на обшыри Солотвиньского Парку в Креници. Як заявлят бургомайстер Крениці Пьотр Рыба, єст шанса, же ремонт пройде уж в тым році. Додатково потік має быти пристосуваный до рекреацийных ціли. То уж другій проєкт місця з водном рекреацийом, якє мало бы ся находити в курорті. Перше такє місце на Чорным Потоці має уж позволіня на будову і повинно быти готове на яр того рока.

Будова видоковой вежы на Мальнику пройде в тым році

Можливе же уж на конец того рока першы туристы будут мочы войти на видокову вежу на горі Мальник над Мушыном. Верх Мальника находит ся на высокости 726 метрів над рівньом моря. Мож з него обзерати Любовняньску Верховину, Пусту Велику і Креницку Яворину, Татры, пасмо Радієвой і Малы Пєніны. Кошт будовы 30-метровой конструкциі то 2 млн злотых. Місто отримало на тоту ціль середкы з Урядового Фонду Локальных Інвестиций. Єдночасно тырвают документацийны працы над початком будовы ґондольовой колейкы з Запопрадя на Мальник. На єй будову треба бы ждати іщы пару років, а кошт будовы єст рахуваный на ок. 25 млн злотых.

Ремонт Ґорлицкого Центру Культуры

Ґорлицкій Центр Культуры має быти ремонтуваный. Місто оголосило конкурс оферт, якій завершыт ся в першых днях лютого/фебруара. Місто має на тоту ціль понад 6 млн злотых брутто. Бургомайстер Ґорлиц Рафал Кукля має надію змістити ся в буджеті. То не перша проба ремонту будинку. Попередні конкурсы оферт были анулюваны, кєд же выконавці хотіли за своі услугы найменше 13 млн зл. В рамках ремонту в будинку мают быти побудуваны кінова і танцювальна салі, а тіж кавярня. Центр має быти вполни достосуваный до потреб неполносправных осіб, заінсталювана буде климатизация. Будинок має быти модерным і функцийональным обєктом даючым великы можливости реализациі плястичных, музичных, театральных ци танцювальных занять.

Тяжкы условія на гірскых путях

Не вшыткы гірскы шлякы сут выдоптаны. Бєщадскій Нацийональный Парк апелювал в комунікаті о стані шляків быти осторожныма і не выходити в горы ночом. Сніжна покрыва має там од 20 до 120 цм. В некотрых місцях снігу могло ся назберати аж і понад 2 метры. Выступує тіж ледова покрыва на шляках, додатково спричынена тыма, котры зъізджают на тзв. ябках. Парк іщы раз апелювал, жебы того не робити. Додатково в высшых партиях гір може быти планна видніст, спричынена сильным вітром і свіжыма опадами снігу. В комунікаті припоминают і о заказі порушати ся по Парку ночом. Як пишут, ніч треба лишыти звірятам. Природникы просят особы, якы плянуют выйти на шлякы, запознати ся з вказівками і мапом тыкаючом одвиджаня Парку в зимовым періоді. Перед прогульком в горы все треба провірити актуальну проґнозу погоды і ступін лявіновой загорозы.