Сумар дня на 26. січня/януара 2026 р.

Приносиме вам сумар медияльной ґрупы ЛЕМ.фм+ на ден 26. січня/януара 2026 р.

Міст на повітовій дорозі в Санковій єст уж переіздный

По парох місяцях прац завершыл ся ремонт мосту на повітовій дорозі нр 1489К в Санковій. Роботы зачали ся кінцьом червця/юнія минулого рока і вязали ся з конечністю хоснуваня парунадцеткілометрового обізду. Як подал староста ґорлицкого повіту Мирослав Вальонґ, то была необхідна інвестиция, але мали свідоміст, як барз утруднят она штоденне фунґуваня жытелів. Зато власти рішыли скорше удоступнити переправу жытелям. Староста підкрислил, же хоц на місци тырвают кінцьовы роботы, то переізд мостом єст вполни безпечный.

Підписане порозумліня в справі професийного надзору для приватных лісів

Як інформувала в минулым тыжни Реґіональна Дирекция Державных Лісів в Кракові, підписали в Ґорлицях порозумліня в справі професийного надзору для приватных лісів. Цілю як найліпшой опікы над лісами, лісникы з єдиниц приналежачых РДДЛ в Кракові і Коросні поглубляют спілпрацю з самоурядами. В Повітовым Старостві в Ґорлицях підписаны были порозумліня на 2026 р., на основі якых специялисты РДДЛ будут мати надзір над приватныма лісами на терені повіту. В практиці то означат, же лісничы з Надлісництв: Ґорлиці, Лося і Колачыці будут сперати властителів лісів (разом коло 7700 га) в мериторичным і згідным з правом заряджаню іх зеленым маєтком. Задачы обнимают порадництво в обшыри дбаня і охороны ліса; маркуваня дерева і выдаваня посвідчыня позысканя го згідно з правом; дбаня о тото, жебы лісоваа господарка была ведена згідно з Упрощеныма Плянами Уряджаня Ліса. Новы пляны уряджаня ліса для Міста Ґорлиці та ґмін: Ґорлиці, Бобова і Мощениця мают быти затвержены іщы до кінця лютого/фебруара тр.

Будова сіти санітарной канализациі в Маластові і Панкной

Як інформує ґміна Санкова, зачынат ся важный етап змін, на якы од років ждали жытелі Маластова і Панкной. Ґміна Санкова підписала догваріня на задачу пн. «Будова сіти санітарной канализациі в місцевости Маластів – Панкна в системі запроєктуй і выбудуй долгости близко 4,7 км». Буде она реализувана при спертю в рамках Державного Пляну Одбудовы. Вартіст задачы то понад 3,4 млн злотых.

Дальшы подіі товаришучы выставі «Формы присутности. Штука Лемків/Карпатскых Русинів»

Ближат ся дальшы подіі товаришучы выставі «Формы присутности. Штука Лемків/Карпатскых Русинів», яка презентувана єст в Державным Етноґрафічным Музею в Варшаві. Уж заран, в віторок 27. січня/януара о 18.00 год. буде мож выслухати выклад пн. «Кым сут Лемкы?». Вюл го буде редактор нашого радия – Демко Трохановскiй. Участникы будут мати нагоду призріти ся тому, кым сут Лемкы як спiльнота i як фунґуют в сучасным соспiльным просторi. Друга част стрiчы буде посвячена iсториi, языкови, зложеным квестиям достоменности, траґічным подiям XX ст. i iх днешнім консеквенциям. Выклад порушыт тiж тему дiяльности лемкiвскых/русиньскых орґанiзаций, ролю меншыновых медий i будучности языка в добi новых технолоґiй. Дармовы білеты мож одобрати на сайті Музею. На четвер 29. січня/януара Музей зрыхтувал дві подіі. О 17.00 год. зачне ся тематичне опроваджаня пн. «Iконы Лемковины», што зосередит ся на культуровій достоменности Лемків/Карпатскых Русинів i символах, якы были хоснуваны для выражыня i сохранiня памяти, духовости i соспiльного досвiдчыня. Опроваджаня поведе Аґнєшка Клєщ. Окрем того, в четвер 29. січня/януара, в рамках зимовых вакаций Музей орґанiзує і родинны пластичны варштаты, де буде мож створити рустикальны декорациi iнспiруваны карпатскыма краєвидами присутныма на выставi. Долучыти мож в свобідным моменті медже 10:00 і 18:00 год. Вхід на обі подіі в рамках білету вступу на выставу.