Сумар дня на 26. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 26. вересня/септембра 2023 р.

Карпатска Стріча, про Бойків і іх оповіданя

В найблизшым часі пройде чергова онляйнова Карпатска Стріча. В четвер, 28. вересня/септембра, о 19.00 год. др Тадеуш Баранюк разом з др. Бартломєйом Хроміком будут мати доповід пн. «Бойківщына зза Сану – краіна епіцкых нарраций». В часі стрічы запрошены гості будут базувати на досліджынях проведеных Варшавскым Університетом в роках 2005-2008 на обшыри Бойківщыны при польско-украіньскій граници. На початку зосередят ся на загальній характерстиці терену в однесіню до економічной і социяльной ситуациі, што буде основом до другой части бесіды – дискусиі на тему оповідань і історий, котры сут частю культуры Бойків. Дослідникы Баранюк і Хромік однесут ся до ріжных жанрів бойківскых байок і до звязку медже творіньом оповідань а культивуваньом традиций в часах кризы. Як підкрисляют орґанізаторы стрічы, буде то єдна з невельох нагід, жебы познати Бойківщыну – не тоту заперту в музейных ґаблотах, але дальше жыву культуру, котра змінят ся разом з часом. Як все, трансмісию мож буде обзерати на каналі YouTube Карпатского Товариства, а кєд дахто хоче взяти активну участ в дискусиі, єст тіж можливіст участи через плятформу ZOOM, при чым скорше треба ся зголосити до орґанізаторів.

В Мушыні пройде одкрытя середвічного замку

Власти курорту Мушына просят на подію торжественного одкрытя зреконструуваного середвічного замку в Мушыні. Акция пройде 30. вересня/септембра і – як передал бургомайстер міста, Ян Ґольба, буде богата в атракциі для каждого. Для звиджаючых будут удоступнены замковы поміщыня, подворец, башта, видокова плятформа та ґастрономічны пункты. Додатково з нагоды одкрытя атракциі орґанізаторы заплянували показы выбияня динарів, рыцарскы показы та артистичны выступы і ярмак. Реконструкция была можлива завдякы дофінансуваню з проґраму Intereg Europa. Мушына разом зо словацкым містом Сабиновом зрыхтувала проєкт, котрого цілю єст зміцняти культурову спадковину пригранича. Найважнійшыма задачами проєкту сут однова і модернізация двох обєктів – руін замку в Мушыні та містецкой фортифікациі в Сабинові.

Краса овадів в обєктиві діти і молодежы

Осередок Еколоґічной Едукациі в Ожынній просит діти і молодіж з ясельского повіту до участи в двох фотоґрафічных конкурсах «Світ палукоподібных» і «Світ овадів». Оба конкурсы проходят в двох віковых катеґориях, для кляс VI-VIII основной школы та учеників середніх шкіл. Цілю конкурсів єст заохочаня молодежы до заінтересуваня фотоґрафійом та природом і єй охороном. Каждый може переслати лем єдну фотоґрафію разом з описом та цифровом версийом на ЦД. До працы треба долучыти зголошыньовый формуляр, котрый находит ся в реґуляміні конкурсу на інтернетовым сайті ОЕЕ. Фотоґрафіі треба переслати або особисто передати до Осередка в Ожынній. Фотоґрафіі мож надсылатидо 10. листопада/новембра. Торжественне нагороджыня і вручыня почестных грамот пройде 22. листопада/новембра.

«Шляк Волошской Культуры»

Стоваришыня Pro Carpathia просит до участи в фотоґрафічным конкурсі «Шляк Волошской Культуры». Цілю акциі єст популяризувати знаня на тему Шляку Волошской Культуры на обшыри підкарпатского воєвідства. Пересыланы знимкы мусят ся односити до культуры, традиций ци пастырскых обрядів або памяток і місц звязаных з Лемками, Бойками і жытелями Карпат. Каждый участник може переслати майльом до 23. жолтня/октобра максимальні 3 працы. Конкурсова капітула нагородит трьох найліпшых туристичныма бонами до выкорыстаня в выпочынковым осередку в Бєщадах. Дрібниці для заінтересуваных находят ся на інтернетовым сайті Стоваришыня Pro Carpathia.